काभ्रे,
काभ्रे जिल्लाको नमोबुद्ध नगरपालिकाले अबिरल वर्षासँगै आएको बाढी र पहिरोबाट भएको क्षतिको प्रारम्भिक क्षति विवरण सार्वजनिक गरेको छ । विवरण अनुसार हालसम्म नगरपालिका भित्र ७ जनाको मृत्यु भएको छ । नगरपालिकाको वडा नम्बर १ मा २ जना, वडा नम्बर ५ मा ४ जना र वडा नम्बर ६ मा १ जना गरी ७ जनाको मृत्यु भएको हो ।
असोज १० गते देखि १२ गते सम्म परेको भिषण वर्षासंगै आएको बाढी र पहिरोमा परेर नगरपालिकाभित्र ४६४ घर पूर्ण क्षति भएको छ । त्यस्तै १ हजार ९३ घर आंशिक क्षति भएको छ । १८४ वटा गोठ तथा पशुफर्मको क्षति पुगेको छ । ५५ वटा भैंसी र ६३ वटा गाई÷गोरु, ३६३ वटा बाख्रा क्षति भएको छ ।
बाढी र पहिरोले दाप्चा खोला, रोशी खोलासहित सम्पूर्ण वडाभित्रका सिंचाई संरचनाहरु पूर्णरुपमा क्षति भएको छ । त्यसैगरि ७ वटा वडा कार्यालय, १० वटा स्वास्थ्य चौकी र १० वटा सामुदायिक भवनमा क्षति पुगेको छ ।
नगरपालिकाभित्र ११९ वटा खानेपानी आयोजनाहरुमा क्षति पुगेको प्रारम्भिक वितरणमा उल्लेख गरिएको छ । ११ वटा माध्यमिक विद्यालय, ३ वटा आधारभूत विद्यालय र २६ वटा प्राथमिक विद्यालयमा क्षति पुगेको छ ।
यस्तै नगरपालिका तथा वडा स्तरीय २४७ वटा सडकमा क्षति पुगेको छ । ५ वटा पक्की पुल बगाएको छ । दाप्चा खोला तर्फ ४ वटा र विभिन्न वडामा गरी अन्य १० वटा कल्भर्ड पूर्ण रुपमा क्षति पुगेको छ ।
