काभ्रे,
काभ्रे जिल्लाको रोशी गाउँपालिकाले अविरल वर्षासंगैको बाढीपहिरोको कारण गाउँपालिकाभित्र ३५० घर पूर्ण क्षति भएको प्रारम्भिक अनुमान गरेको छ । गाउँपालिकाले तयार पारेकोे क्षतिको प्रारम्भिक अनुमान अनुसार बाढीपहिरोमा परेर पालिकाभित्र हालसम्म १२ जनाले ज्यान गुमाएका छन भने ५५ जना घाईते भएका छन् । क्षतिको प्रारम्भिक विवरण अनुसार ३५० घर पूर्ण र ७१० घरमा आंशिक गरि १ हजार ६० वटा निजी घरमा क्षति पुगेको छ । १७२ किलोमिटर सडक पूर्ण रुपमा क्षतिग्रस्त भएको छ ।
त्यसैगरि पालिकाभित्रका बिभिन्न ६ वटा पुल, एउटा मोटरेबल पुल र ५ वटा झोलुङ्गे पुल पूर्ण क्षति भएको छ । २७ वटा विद्यालयमा क्षति पुगेको छ । एक वटा १० शैयाको अस्पताल पूर्ण क्षति भएको छ । वडा नम्बर १ को स्वास्थ्य चौकी पूर्ण र ५ को स्वास्थ्य चौकी आशिंक क्षति भएको छ । वडा नम्बर ९ को सामुदायिक स्वास्थ्य इकाई आंशिक क्षति भएको छ । अन्य ४ वटा स्वास्थ्य संस्थाको कम्पाउण्ड वाल भत्किएको विवरणमा जनाईएको छ । १६० वटा खानेपानी आयोजना पूर्ण रुपमा क्षति भएको छ ।
बाढी र पहिरोको कारण ९३ वटा भैंसी, १० वटा गाई÷गोरु, २३८ वटा बाख्रा र ८३८ वटा कुखुरा गरी ११७९ वटा पशुचौपायको क्षति भएको छ । त्यसैगरि ४ हजार ५६० रोपनी धानखेती, ५ हजार ७४० रोपनी जग्गाको तरकारी तथा मकै बालीमा क्षति पुगेको छ ।
गाउँपालिकाभित्र रहेको १ वटा औद्योगिक ग्राम, १ वटा डम्फु जिवन्त संग्रहालय, २ वटा तरकारी संकलन केन्द्र, १ वटा दुग्ध सहकारी, २ वटा दूध संकलन केन्द्र र १ वटा चिस्यान केन्द्रमा क्षति भएको गाउँपालिकाले प्रारम्भिक अनुमान गरेको छ ।
