फागुन २७,
२०७७,काभ्रे/
खाद्य प्रविधि तथा गुण नियन्त्रण डिभिजन कार्यालय धुलिखेल काभ्रेले दोलालघाटमा रहेका ७ वटा होटलमा अनुगमन गरी स्टिकर टाँसेको छ । “होटलहरुको लोगो स्तरिकरण तथा नविकरण कार्यक्रम” मार्फत आर्थिक वर्ष २०७७/०७८ को वार्षिक कार्यक्रम अनुसार खाद्य स्वच्छताको आधारमा होटल रेष्टुरेन्ट स्तरीकरण गर्ने सम्बन्धी निर्देशिका, २०७४ अनुसुचि १ बमोजिम प्राप्त निवेदनका आधारमा मंगलबार स्थलगत अनुगमन गरिएको हो । बजारका ७ वटा होटलमा अनुगमन गर्दा ३ वटा होटलले हरियो स्टिकर (सन्तोषजनक ‘ग’) प्राप्त गरे भने ४ वटा होटलले पहेलो स्टिकर (सामान्य ‘घ’) प्राप्त गरेका छन् ।
कार्यालयका प्रमुख नारायण प्रसाद भट्टराईको नेतृत्वमा गएको अनुगमन टोलीले दोलालघाटमा रहेका ७ वटा होटलहरुमा अनुगमन गरी स्तरीकरणको लोगो टास्दै व्यवसायीहरुलाई आगामी दिनमा सुधार गर्ने प्रतिवद्धता गराएको छ । सरसफाई, सेवा प्रदान लगायत ५० वटा सूचकका आधारमा अनुगमन गरिएको कार्यालयका प्राविधिक सहायक अतिस घिमिरेले जानकारी दिनुभयो । स्तरीकरण गरिएका होटल व्यवसायीहरुलाई खाद्य स्वच्छता सम्बन्धी प्रतिवद्धता गराई सार्वजनिक रुपमा फ्लेक्स बनाएर टाँस्न अनुरोध गर्दै प्रमाणपत्र समेत वितरण गरिएको थियो ।
