काभ्रे,
जिल्ला प्रशासन कार्यालय काभ्रेपलाञ्चोकले राती साढे ९ बजेपछि देउसी–भैलो खेल्न रोक लगाएको छ । प्रशासनले एक विज्ञप्ति जारी गर्दै राति साढे ९ बजेसम्म मात्रै देउसी–भैलो खेल्न सर्वसाधारणलाई आग्रह गरेको हो । सहायक प्रमुख जिल्ला अधिकारी सुवास पौडेलले जारी गर्नुभएकोे सूचनामा देउसी भैलो लगायतका सांस्कृतिक कार्यक्रमहरु मर्यादित, अनुशासित एवम् व्यवस्थित ढङ्गले सञ्चालन गर्न गराउनुहुन अनुरोध गरिएको छ । ‘देउसी भैलोका कार्यक्रमहरु राति ९ः३० बजे पछि संचालन नगर्नु हुन अनुरोध गरिन्छ ।’– सहायक प्रजिअ पौडेलले जारी गर्नुभएकोे सूचनामा भनिएको छ ।
चाडपर्वहरुको यस अवसरमा शान्ति सुरक्षामा असर पर्ने गरी सार्वजनिक स्थानमा हो–हल्ला एवम् झै–झगडा गर्ने, मादक पदार्थको सेवन गरी पारिवारिक एवम् सामाजिक जनजीवन तथा सार्वजनिक मर्यादा र शान्ति खलल गर्ने, कानून विपरीत जुवातास, लङ्कुरबुर्जा खेल्ने खेलाउने, भुइँचम्पा, पटका, आतसबाजी जस्ता विपद् जोखिम निम्त्याउने तथा बातावरण प्रदुषण हुने विस्फोटक एवम् प्रज्वलनशील पदार्थको प्रयोग, ओसार पसार, विक्री वितरण गर्ने जस्ता कार्य नगर्न÷नगराउन अनुरोध गरिएको छ । कानूनले निषेध गरेका यस्ता गतिविधि गरे÷गराएमा कानून बमोजिम कारवाही हुने सूचनामा उल्लेख गरीएको छ ।
सूचनामा उल्लेखित कुराहरुको बर्खिलाप हुने गरी कोही कसैले कुनै गतिविधि गरे ÷ गराएको पाईएमा नजिकैको प्रहरी चौकि या जिल्ला प्रहरी कार्यालय धुलिखेल काभ्रेपलाञ्चोकका सूचना अधिकारीको मोवाइल नं. ९८५१२३७३३९ मा सम्पर्क गरी जानकारी गराउनु हुन समेत अनुरोध गरीएको छ ।
