काभ्रे,
काभ्रे जिल्लाको रोशी गाउँपालिका–१ स्थित १० शय्याको निर्माणाधीन अस्पताल भवनको अस्थायी संरचना बन्ने भएको छ । गत असोज दोस्रो साता अबिरल बर्षासँगै रोशी खोलामा आएको बाढीपहिरोले बगाएको उक्त अस्पताल भवनको अस्थायी संरचना बन्ने भएको हो ।
यसको लागि विश्व स्वास्थ्य संगठनले निर्माण सहयोग गर्ने भएको छ। हिजो गाउँपालिकाका अध्यक्ष दिनेश लामा र विश्व स्वास्थ्य संगठनका प्रतिनिधिले अस्पतालको अस्थायी संरचना निर्माणस्थलको निरीक्षण समेत गरेका छन् ।
अस्पतालको स्थायी भवन निर्माणको लागि सुरक्षित ठाउँ खोजी भईरहेको गाउँपालिकाका अध्यक्ष लामाको भनाई छ । अस्थायी संरचनाबाट दुई महिनाभित्र सेवा सुरु गर्ने गरी निर्माण तयारी भएको अध्यक्ष लामाले जानकारी दिनुभयो । स्वास्थ्य मन्त्रालयअन्तर्गत ६ करोड पाँच लाख २४ हजार लागतमा बनिरहेको अस्पताल हस्तान्तरणको अन्तिम चरणमा थियो । तर असोज दोस्रो साताको बाढीपहिरोले अस्पताल भवन तहसनहस पारेपछि अस्पताल अहिले खहरेपाँगु प्रहरी चौकीनजिकै त्रिपालमा सञ्चालित छ ।
