काभ्रे,
काभ्रे जिल्लाको रोशी गाउँपालिका वडा नं ११ भीमखोरीका ८० घरपरिवारले सोलार बत्ती पाएका छन् । ‘गाउँ उज्यालो बनाउँ’ परियोजना मार्फत असोज दोस्रो साताको बाढीपहिरोले राष्ट्रिय प्रशारण लाइनको विद्युतविच्छेद भएको सो स्थानका ८० घरधुरीमा सोलार वितरण गरीएको हो ।
चीनको ह्वायान टेम्पल अफ छोङछिङको सहयोगमा ८० घरधुरीलाई सोलार वत्ती उपलव्ध गराइएको हो । नेपालस्थित चिनियाँ दुतावासमार्फत उक्त टेम्पलले रोशी गाउँपालिका, रसुवाको आमा छोदिङमो गाउँपालिका र गोदावरी नगरपालिकामा ‘गाउँ उज्यालो बनाउँ’ परियोजना मार्फत सहयोग गरेको थियो ।
मंगलबार काठमाडौंमा आयोजित पत्रकार सम्मेलनमा नेपालस्थित चिनियाँ दूतावासका काउन्सुलर सि वाङले दुवै देशका नागरिकको सोच एकै भएकोले साथ साथै अघि बढ्ने विश्वास व्यक्त गर्नुभयो । बाढी र पहिरो प्रभावित गाउँमा सहयोग गर्न पाएकोमा खुशी व्यक्त गर्नुभएको छ । साथै आगामि दिनहरुमा सरसफाइका सामाग्री पनि सहयोग गर्ने उहाँले प्रतिवद्धता जनाउनुभयो ।
रोशी गाउँपालिका अध्यक्ष दिनेश लामाले अझै प्रशारण लाइन नपुगेको गाउँमा गरिएको रचनात्मक सहयोगको लागि आभार प्रकट गर्नुहुदै निरन्तरताको कामना गर्नुभएको छ । अध्यक्ष लामाले विपद्पछिको पुनर्निर्माणमा सघाउन काउन्सुलरमार्फत दुतावासलाई अनुरोध समेत गर्नुभएको छ ।
असोज दोस्रो साताको बाढीपहिरोले रोशी गाउँपालिकामा १२ जनाले ज्यान गुमाएका थिए । त्यस्तै ५ सय ४ घरधुरी पूर्ण क्षति हुनुका साथै २५ सय ४४ घरधुरीका खेतबारी र पशुपंक्षी नष्ट भएको थियो ।
