काभ्रे,
हनिट्रयापमा पारेर रकम असुली गर्ने भुम्लु गाउँपालिकाका दाजु बहिनीसहित ३ जना पक्राउ परेका छन् । भक्तपुरका फार्मेसी सञ्चालकलाई अनलाइनमार्फत ‘घाउ ड्रेसिङ गर्नुपर्ने छ’ भनेर बोलाएर उनिहरुले हनिट्रयापमा पारेका हुन् । भक्तपुरको राधेराधे नजिकै डेरामा बोलाएर उनीहरुले ३३ वर्षीय युवकलाई हनिट्रयापमा पारेर रकम असुलेका हुन् । ३३ वर्षीय फार्मेसी सञ्चालकले अनलाइनमार्फत घरमा ‘डेसिङ्ग सेवा’ दिँदै आएका थिए ।
पक्राउ पर्नेहरुमा काभ्रेपलाञ्चोक जिल्लाको भुम्लु गाउँपालिका वडा नम्बर ४ घर भएर स्वयम्भू बस्ने ३० वर्षीय दीपेन्द्र दर्जी २५ वर्षीया वर्षा दर्जी र इलाम घर भएर नयाँथिमी बस्ने २५ वर्षीय समृद्धि मगर रहेका छन् । पक्राउ परेका दीपेन्द्र र वर्षा दाजुबहिनी हुन् । उनीहरूलाई भक्तपुरको मध्यपुर थिमी नगरपालिका वडा नम्बर ३ बाट पक्राउ गरिएको उपत्यका अपराध अनुसन्धान कार्यालयका एसपी काजी कुमार आचार्यले बताउनुभयो ।
बलात्कार मुद्दामा फसाउँछौँ भनेर ८ लाख लिने सर्तमा उनीहरुले कुरा मिलाएको अनुसन्धानबाट खुलेको उपत्यका अपराध अनुसन्धान कार्यालयका एसपी काजी कुमार आचार्यले बताउनुभयो । आरोपीहरूलाई आपराधिक लाभ सम्बन्धी कसुरमा कारबाही गर्न जिल्ला प्रहरी परिसर भक्तपुरमा पठाएको एसपी आचार्यले जानकारी दिनुभयो ।
