काभ्रे,रेडियो रोशी,
काभ्रे जिल्लाको नमोबुद्ध नगरपालिकामा सुरक्षित मातृत्व कार्यक्रम अन्तर्गत उपमेयर सङ्ग सुत्केरी पोषण कार्यक्रम सञ्चालन भएको छ । आज कार्यक्रमको पहिलो दिने वडा नं.१ श्यामपाटी सिमलचौर स्वास्थ्य चौकिमा उपमेयर सङ्ग सुत्केरी पोषण कार्यक्रम अन्तर्गत सुत्केरी महिलाहरुलाई पोषण सामाग्री बितरण गरीएको छ । वडा अध्यक्ष प्रेम बहादुर तामाङले सुत्केरी महिलाहरुलाई पोषण सामाग्री वितरण गर्नुभएको हो ।
सुत्केरी पोषण सामाग्री अन्तर्गत सुत्केरी महिलाहरुलाई गेडागुडि, घिउ, हर्लिक्स, सुत्केरी मसला, बत्तिसा मसला, बच्चाको लागि न्यानो कपडा र आमाको लागि पच्छ्र्यौरा बितरण गरीएको नगरपालिकाका स्वास्थ्य शाखा प्रमुख सुनिल केसिले रेडियो रोशीलाई जानकारी दिनुभयो ।
अघिल्ला बर्षहरुमा पनि सञ्चालन भएको यो कार्यक्रम नेपाल सरकारको नभई स्थानीय सरकार नमोबुद्ध नगरपालिका भित्र रहेको स्थानीय सुत्केरी महिलाहरुको स्वास्थ्य प्रवर्द्धनका लागि आ.व ०८१÷०८२ मा पनि सञ्चालनमा ल्याईएको नगरपालिकाका उप मेयर रत्न बहादुर लामाले बताउनुभयो ।
उपमेयरसङ्ग सुत्केरी पोषण कार्यक्रम नगरपालिका भित्र रहेको स्थानीय गर्भवतीको स्वास्थ्य संस्थामा जाँच संख्या बढाउन ल्याएको कार्यक्रम हो, जस्ले गर्भवती महिलाहरुको स्वास्थ्य स्वस्थ राख्न मद्दत गर्द्छ । बाल मृत्युदर र मातृ मृत्युदर हुन सक्ने भएकाले यसलाई न्यूनीकरण अथवा निराकरण गराउने उदेश्यले नगरपालिकाले उपमेयर सङ्ग सुत्केरी पोषण कार्यक्रम चलाउदै आएको छ । नागरिकको स्वास्थ्य सङ्ग सम्बन्धित भएकाले यो कार्यक्रमलाई निरन्तरता दिईने बताईएको छ ।
नगरपालिका भित्रका सुत्केरी महिलाले नगरभित्र रहेका स्वास्थ्य संस्थाहरुमा निरन्तर चेकजाँच गराएका महिलाहरुले पोषण कोसेली पाउने नगरपालिकाका स्वास्थ्य शाखा प्रमुख सुनिल केसिले बताउनुभयो । नगरपालिकाको सबै वडाहरुका स्वास्थ्य संस्थामा पोषण सामाग्री पुगिसकेको बताउनुहुदै स्वास्थ्य सस्थासम्म पुग्न नसक्नेलाई घरमै पुगेर बितरण गरीने उहाँले रेडियो रोशीलाई जानकारी दिनुभयो ।
