चैत्र १८,
२०७७,काभ्रे/
जिल्लाको रोशी गाउँपालिका भित्र रहेको माध्यमिक तहका विद्यालयहरुहरु सँग रोशी गाउँपालिकाले अन्तर्क्रिया गरेको छ । बुधबार रोशी गाउँपािलकाको कार्यालय कटुन्जेवेशीमा भएको अन्तर्क्रिया कार्यक्रममा पालिका भित्र रहेको १६ ओटा माध्यमिक विद्यालयका विद्यालय व्यवस्थापन समिति अध्यक्ष र प्रधानाध्यापकहरुको उपस्थिति रहेको थियो ।
कार्यक्रममा रोशी गाउँपालिकाका अध्यक्ष डि.बि. लामाले विद्यालयलाई राजनीति गर्ने थलो नबनाउन आग्रह गरे । अध्यक्ष लामाले विद्यालयको शैक्षिक स्तरलाई उकास्न विद्यालयहरुको अभ्यास कस्तो छ, समस्या के हो, चुनौति के हो र त्यसको हल के हो भन्ने विषयमा छलफल गरी प्रत्येक विद्यालयको उत्कृष्ट विषय वस्तुलाई समावेश गरी आगामी दिनमा नीति तथा कार्यक्रम बनाउन सहयोग हुने बताए ।
पालिकाका शिक्षा शाखा प्रमुख राम बहादुर तामाङले विद्यालय शिक्षाको गुणस्तर, गुणस्तरका मापदण्ड तथा सूचकहरु, शैक्षिक गुणस्तरका राष्ट्रिय तथा अन्तराष्ट्रिय अभ्यासहरु, शिक्षाको सुधारका लागि नीतिगत व्यवस्था, विद्यालय शिक्षाको गुणस्तरमा देखिएका समस्या तथा चुनौतिको विषयमा छलफल भएको बताए ।
त्यसैगरी कार्यक्रममा प्रमुख प्रशासकिय अधिकृत र शिक्षा शाखा प्रमुख विच सम्पन्न कार्यसम्पादन करार सम्झौता आदान प्रदान भएको थियो । जसमा आर्थिक वर्ष २०७७/०७८ को नीति तथा कार्यक्रमको कार्यन्वयन गर्न गराउन मञ्जुर भई एक एक प्रति आपसमा बुझि लिएको, दिएको, पहिलो पक्षले दोस्रो पक्षको कार्यसम्पादन मूल्यांकनमा प्रयोग गर्ने, सम्झौतामा उल्लेख नभएको कुरा प्रचलित नेपालको कानुन बमोजिम हुने भएको जस्ता सूचकमा आधारित भएर करार सम्झौता गरेको शिक्षा शाखाका प्राविधिक सहायक राजेन्द्र सिग्देलले जानकारी दिए ।
कार्यक्रमा उपस्थित विद्यालयका प्रधानाध्यापक तथा विद्यालय व्यवस्थापन समितिका हध्यक्षहरुले आ–आफ्नो विद्यालयको विगत देखि वर्तमान सम्म गरेका कार्यहरु, समस्या चुनौतिहरु अभ्यासहरु तथा भावी योजनाको विषयमा प्रस्तुतीकरण दिएका थिए ।
