काभ्रे,
आप्रवासी निष्कासन अभियानअन्तर्गत अमेरिकाले १३ सय ६५ जना गैरकानुनी आप्रवासी नेपालीलाई निष्कासन गर्ने भएको छ । अमेरिकाको अध्यागमन कार्यालयले सार्वजनिक गरेको सूचीअनुसार १३ सय ६५ जना नेपाली अमेरिकाबाट निष्कासनमा पर्ने भएका हुन् । कार्यालयले १३ सय ६५ नेपालीसहित विभिन्न देशका १४ लाख ४५ हजार ५ सय ४९ जना आप्रवासीको सङ्ख्या सार्वजनिक गरेको हो ।
डोनाल्ड ट्रम्पले राष्ट्रपतिको जिम्मेवारी सम्हालेसँगै अमेरिकाले गैरकानुनी आप्रवासीलाई घर फर्काउन सुरु गर्नुभएको हो । ट्रम्पले शपथ ग्रहण गरेलगत्तै अवैध आप्रवासीलाई उनीहरूकै देश फिर्ता गर्ने कार्यकारी आदेशमा हस्ताक्षर गर्नुभएको थियो ।
ट्रम्पले पदभार ग्रहण गरेयता कम्तीमा २ हजार ६ सय ८१ जना अनधिकृत आप्रवासी पक्राउ परेका छन् । ट्रम्पले चुनावी अभियानमै घोषणा गरेअनुसार दक्षिणी सीमामा सङ्कटकाल घोषणासमेत गरिसक्नुभएको छ । सङ्कटकाल घोषणासँगै अमेरिकाले मेक्सिकोसँगको सीमा क्षेत्रमा १५ सय सैनिक तैनाथ गरेको छ ।
