काभ्रे,
पुल निर्माणमा ढिला सुस्ति भएपछि काभ्रेको महाभारत गाउँपालिका, खानिखोला गाउँपालिका र मकवानपुरको बागमती गाउँपालिकाको टोलीले प्रदेश सरकारलाई ध्यानाकर्षण पत्र बुझाएका छन । बुधवार सिक्रे दोमान बागमती नदीको पक्की पुल, रोशी र महाभारत जोड्ने पक्की पुल र जनमुक्ति मार्गको निर्माणमा ढिला सुस्ति भएको बारे वागमती प्रदेशको मुख्यमन्त्री र भौतिक पुर्वधार मन्त्रीलाई ध्यानाकर्षण पत्र बुझाएका हुन् ।
खानिखोला गाउपालिकाका अध्यक्ष इन्द्र बहादुर थिङ छिन्ताङ, वडा नम्बर ४ का वडाअध्यक्ष निशान मोक्तान, वडा नम्बर ५ का वडाअध्यक्ष बुद्वि बहादुर स्याङ्तान, महाभारत गाउपालिकाका अध्यक्ष कान्छालाल जिम्बा र मकवानपुरको बागमति गाउपालिकाका अध्यक्ष सर्केश घलानले संयुक्त रुपमा मुख्यमन्त्री तथा मन्त्रीपरिषदको कार्यालय हेटौंडामा पुगेर ध्यानाकर्षणा पत्र बुझाएका हुन । बागमती प्रदेश अन्तर्गत खानीखोला, महाभारत (काभ्रेपलाञ्चोक) र बागमती गाउँपालिका (मकवानपुर) का बासिन्दाहरू वर्षौंदेखि सडकको अभावमा चरम समस्या भोग्दै आएका छन् ।
ध्यानाकर्षण पत्र बुझ्दै मूख्यमन्त्री बहादुरसिंह लामा र भौतिक पूर्वाधार विकास मन्त्री अमनलाल मास्केले दुर्गम पालिका जोड्ने बागमती नदीको सिक्रे दोभान पुल निर्माणलाई प्राथमिकतामा राख्ने बताउनुभएको छ ।
ध्यानाकर्षण गराउन पुगेका जनप्रतिनिधिहरूलाई यस पुललाई चाँडो सम्पन्न हुने गरि प्रक्रिया अघि बढाउन मूख्यमन्त्री लामाले भौतिक मन्त्री मास्केलाई निर्देशन दिनुभएको छ । उहाँले विपदका कारण त्यस क्षेत्रमा भएको सडक सञ्जाल र अन्य पुलको समेत निर्माणमा तदारुकता दिने बताउनुभयो ।
