काभ्रे,रेडियो रोशी,
काभ्रे जिल्लाको नमोबुद्द नगरपालिकाले सम्मान तथा बिबिध साँस्कृतिक कार्यक्रम गर्दै ११५औ अन्तर्राष्ट्रिय महिला दिवस मनाएको छ । आज नगरप्रमुख कुन्साङ लामाको प्रमुख आतिथ्यतामा कार्यक्रम सञ्चालन भएको हो । कार्यक्रमको प्रमुख अतिथि तथा नगर प्रमुख कुन्साङ लामाले पानसमा दिप प्रज्वलन गरेर शुभारम्भ गर्नुभएको थियो ।
नगरपालिकाको महिला तथा वालवालिका शाखाको आयोजनामा कार्यक्रमको आयोजना गरिएको हो । कार्यक्रममा कार्यपालिका सदस्य सुसिला परियारले स्वागत मन्तब्य राख्नुभएको थियो । यस बर्षको लागि दिवसको राष्ट्रिय नारा ‘सबै महिला तथा बालिकाको लागिः अधिकार, समानता र सशक्तिकरण’ भन्ने रहेको छ ।
कार्यक्रमलाई सम्बोधन गर्नुहुदै नगरप्रमुख लामाले ११५ औं अन्तर्राष्ट्रिय महिला दिवस सफलताको सम्पूर्ण नगरवासी दिदीबहिनीहरुमा शुभकामना व्यक्त गर्नुभएको छ । महिलाहरुको समानता, सशक्तिकरण र सम्मानको लागि यो दिवस विशेष रहने उहाँको भनाई छ ।
महिलाहरु समाजको अभिन्न अंग हुन् र उनीहरुको विकास बिना समाजको समग्र विकास सम्भव नहुने उहाँको भनाई छ । महिलाहरुलाई आत्मनिर्भर बनाउन र उनीहरुको प्रतिभालाई प्रस्फुटित गर्न प्रतिबद्ध रहेको बताउनुभयो ।
नगरपालिकाका सम्पूर्ण महिला कर्मचारी, महिला जनप्रतिनिधि र महिला सामाजिक कार्यकर्ताहरुलाई उहाँहरुको अथक प्रयास र योगदानको लागि ज्ञापन गर्नुभएको छ । त्यसैगरी मानव अधिकारकर्मी भोजराज तिमल्सिनाले अन्तर्राष्ट्रिय महिला दिवस मनाउनुको औचित्यमाथि प्रकाश पार्नुभएको थियो ।
दिवसको अवसरमा महिलाहरुको हक र अधिकारको क्षेत्रमा सकृय दुई ब्यक्तित्वलाई सम्मान समेत गरिएको छ । यसरी सम्मानित हुनेहरुमा महिलाहरुको हक र अधिकारको क्षेत्रमा सकृय रहेर कार्य गर्दै आउनुभएको नमोबुद्द नगरपालिका वडा नं.१० का वडा अध्यक्ष रामकृष्ण उपाध्याय र महिलाहरुको आवाजलाई बुलन्द गरेर बिगत ३ दशकदेखी पत्रकारितामा संलग्न हुनुभएको भगवति तिमल्सिना रहेका छन् ।
त्यसैगरी ११५औ अन्तर्राष्ट्रिय महिला दिवसको अवसरमा आयोजना गरीएको वक्तृत्वकला प्रतियोगितामा विजेता छात्राहरुलाई नगद र प्रशंसापत्रद्धारा सम्मानित गरीएको छ । वक्तृत्वकला प्रतियोगितामा श्री बाल उज्वल मा.वि मा अध्ययनरत छात्रा मनिसा घोरसैनी प्रथम, श्री कृष्ण मा.वि मा अध्ययनरत छात्रा आयुषा सुवाल दोस्रो, आवासीय मा.वि मा अध्ययनरत छात्रा अनिता तामाङ तेस्रो र राम मा.वि मा अध्ययनरत छात्रा सचिता अधिकारी चौथो बनेका थिए । प्रथम, दोस्रो, तेस्रो र चौथो हुने छात्राहरुलाई क्रमशः दस हजार, सात हजार, पाँच हजार र तिन हजार नगद र प्रशंसापत्रद्धारा सम्मान गरीएको हो । कार्यक्रममा कलाकारहरु कृष्ण समिप, कल्पना सुनुवार, कामना वली लगायतले प्रस्तुति दिएका थिए ।
कार्यक्रममा मानव अधिकारकर्मी भोजराज तिमल्सिना, महिला सहकारी सञ्जालका अध्यक्ष राधिका तिमल्सिना तथा सञ्जालका पदाधिकारीहरु, नमोबुद्व नगरपालिका नगर युवा परिषद् कार्यकारी उपाध्यक्ष रामेश्वर अधिकारी,बिभिन्न वडाका वडा अध्यक्षहरु, पत्रकारहरु, कलाकारहरु लगायतको सहभागिता रहेको थियो । नगरपालिकाका उपप्रमुख रत्न लामाको सभाध्यक्षतामा भएको कार्यक्रम महिला, बालबालिका तथा जेष्ठ नागरीक शाखाका प्रमुख तारा सुनुवारले सञ्चालन गर्नुभएको थियो ।
