बैशाख ३,
२०७८,काभ्रे/

जिल्लाको नमोबुद्ध नगरपालिकाको जनक माध्यामिक विद्यालयबाट राष्ट्रपति रनिङ शिल्ड प्रतियोगिता सुरु भएको छ । नमोबुद्ध नगरपालिकाको आयोजना र जनक माध्यामिक विद्यालयको संयोजनमा शुक्रबारदेखि सुरु भएको प्रतियोगिताको एक कार्यक्रमका बीच नमोबुद्ध नगरपालिकाका प्रमुख टिपी शर्मा तिमल्सिनाले उद्घाटन गरे ।

प्रतियोगिताको उद्घाटन कार्यक्रममा नगर प्रमुख तिमल्सिनाले अनुशासनका लागि खेलकुद अति महत्वपूर्ण रहेको बताए । गत बर्ष कोभिड–१९ का कारण खेलकुदका गतिविधि राम्रोसँग सञ्चालन गर्न नसकेको बताउँदै तिमल्सिनाले आगामी आर्थिक बर्षमा खेलकुद क्षेत्रमा पर्याप्तमात्रामा बजेट विनियोजन गर्ने प्रतिवद्धता पनि जनाए । कला, साहित्य र खेलकुल क्षेत्रलाई नगरपालिकाले विशेष प्राथमिकता दिने उनले बताए ।
कार्यक्रममा नमोबुद्ध नगरपालिका उप्रमुख रामदेवी तामाङ, नगरपालिकाका प्रमुख प्रशासकीय अधिकृत राजन पौडेल, नमोबुद्ध नगरपालिका शिक्षा, युवा तथा खेलकुद शाखाका प्रमुख उपसचिव जनार्दन रिजालले खेलाडिहरुलाई शुभकामना दिए ।

प्रतियोगितामा नमोबुद्ध नगरपालिकाभित्र रहेका १५ वटा माध्यामिक विद्यालयमध्ये १३ वटा विद्यालयका कुल ४ सय ८० जना विद्यार्थीले सहभागिता जनाएका छन् । आइतबारसम्म प्रतियोगितामा एथलेटिक्स, ज्याभलिन थ्रो, सटपुट, कबड्डी, भलिबल, लङजम्प, हायजम्प लगायतका खेलका १५ वटा इभेन्टमा खेल खेलाइने जनक माविका शिक्षक हरिहर अधिकारीले जानकारी दिएका छन् । प्रतियोगिताका विजयी हुने खेलाडीले जिल्लास्तरीय रनिङ शिल्ड प्रतियोगितामा सहभागिता जनाउनेछन् । प्रतियोगिताको उद्घाटन कार्यक्रममा नमोबुद्ध ४ का वडा अध्यक्ष उद्धवप्रसाद काफ्ले, नगरपालिकका विभिन्न विद्यालयका प्रधानाध्यापक लगायतको उपस्थिति रहेको थियो ।

Facebook Comments Box