काभ्रे,
अनेरास्ववियु नमोबुद्ध नगर कमिटीले सामूहिक राजीनामा दिएको छ । अनेरास्ववियु नमोबुद्ध नगर कमिटीले आसन्न स्ववियु निर्वाचनको बिषयलाई लिएर आफुहरुलाई पार्टीका नेताबाट धम्की आएको भन्दै नगर कमिटीका सबै पदाधिकारीहरुले सामुहिक राजिनामा दिएका हुन् । जिल्लामा स्ववियु निर्वाचनका लागि पाचँवटा संगठनबीच भागबण्डा गर्दा जनक बहुमुखी क्याम्पस अनेरास्ववियुकै भागमा परेको थियो । तर पार्टीकै एक नेताबाट हुकुमी शैलीमा छोराको नाममा पत्र मार्फत निर्देशन जारी गरेपछि सबै पदाधिकारीहरुले सामुहिक राजिनामा दिएका हुन् ।
राजिनामा पत्रमा विद्यार्थीहरूको हकहितका लागि निरन्तर लागिरहेको अनेरास्ववियु नमोबुद्ध नगर कमिटी र जिल्ला कमिटीमा आबद्ध भई आवाज उठाइरहेका थियौँ । अनेरास्ववियुको नीति र कार्यक्रमलाई सफल बनाउन हामीले आफ्नो तर्फबाट इमानदारीसाथ सक्रिय भएका थियौं भनिएको छ। साथै आसन्न स्ववियु निर्वाचनको तयारीमा हामी दिनरात अनेरास्ववियुलाई जिताउन लागि रहेको पनि राजिनामा पत्रमा उल्लेख गरीएको छ ।
नगरभित्रका स्ववियु निर्वाचन हुने क्याम्पसहरुमा केही दिन अघि मात्रै हामीलाई खबर नगरी केही व्यक्तिले कलेजमा भर्ना नभएको गैरविद्यार्थीलाई कमिटीको अध्यक्ष बनाएको थाहा हुन आएको पत्रमा उल्लेख छ । हाम्रो भुगोलको क्याम्पसमा हामीलाई नजानु भनेर पार्टी नेताहरुबाट धम्की दिइएको पनि उल्लेख छ ।
स्ववियु निर्वाचनमा नगर कमिटी बैठकबाट जनक बहुमुखी क्याम्पसमा सभापति पदका लागि क्याम्पसका साथिहरू, नगरका पदाधिकारी र जिल्ला कमिटीका साथिहरू बसेर गरेको निर्णयलाई पार्टी नेताको दबाबमा बेवास्ता गरिएको र जिल्लाले हस्तक्षेप गरेको कारण उनीहरूको भूमिका केही नहुने महसुस भएपछि यो कदम चालेको उनीहरूले बताएका छन् ।
पत्रमा अनेरास्ववियुमा नगर कमिटीको कुनै भुमिका नहुने, पार्टी नेताहरूले धम्की दिने, संगठनमा क्रियाशील नभएको व्यक्तिलाई टिकट दिने जस्तो गतिविधि संगठनको नियम विपरीत भएको हुदा हामी कार्यकर्ता हतोत्साहित भएको भन्दै राजिनामा दिएको पाइएको छ ।
राजीनामापत्रको बोधार्थ नेकपा एमाले जिल्ला कमिटी काभ्रे, नेकपा एमाले नमोबुद्ध नगर कमिटी र अन्तरस्ववियु काभ्रे जिल्ला कमिटीलाई दिइएको छ ।
