काभ्रे,
गत असोज दोस्रो साताको मनसुनजन्य विपदबाट क्षतिग्रस्त निजी आवासहरूको विस्तृत क्षति आंकलन थालिएको छ । आज गृहमन्त्री रमेश लेखकले रोशी गाउँपालिका वडा नम्बर २ का ३ जनालाई क्षति आंकलन निस्सा उपलब्ध गराउँदै विस्तृत क्षति आंकलनको शुभारम्भ गर्नुभएको हो । मनसुनजन्य विपदबाट ज्यादा प्रभावित जिल्ला र स्थानीय तह भएकाले काभ्रेको रोशीबाट सुरुवात गरिएको मन्त्री लेखकले बताउनुभयो ।
कार्यक्रमको सुरुवात गर्नुहुँदै मन्त्री लेखकले बाढीपहिरोबाट पूर्ण क्षति भएका सबै निजी आवास एक वर्षमा पूरा गर्न सरकार प्रतिबद्ध रहेको बताउनुभयो । केही नीति, कानुन र कार्यविधिका कारण बाढीपहिरोबाट भएको क्षतिको पुननिर्माणमा ढिलाइ भएको उहाँले बताउनुभयो ।
क्षति आंकलनपछि पुननिर्माण सहज हुने बताउनुहुदै गृहमन्त्री लेखकले विस्तृत क्षति सङ्कलनको काम सम्पन्न भए लगत्तै अस्थायी र स्थायी आवासको काम सुरु गरिने बताउनुभयो । साथै, विपी राजमार्ग पुनःनिर्माण कार्य अघि बढिसकेको र बर्खामा समेत राजमार्ग सञ्चालन गर्ने गरी कार्य प्रारम्भ भएको बताउनुभयो ।
कार्यक्रममा प्रतिनिधिसभा क्षेत्र नम्बर १ का सदस्य सूर्यमान दोङले पुल, तटबन्धनलगायतका पूर्वाधार निर्माण गरेर मात्रै पुनर्निर्माण पूर्ण हुने बताउनुभएको छ । नेपाली कांग्रेस काभ्रेका सभापति तीर्थ लामाले नारायणटार लगायत काभ्रेका विभिन्न खेतीयोग्य फाँटहरू बगरमा परिणत भएको भन्दै दुई वर्षभित्र पुरानै अवस्थामा फर्काउन योजना र कार्यक्रम ल्याउनुपर्नेमा जोड दिनुभयो । त्यस्तै निजी आवास सँगै सडक, पुल लगायतका पूर्वाधार पुननिर्माण गरिनुपर्नेमा जोड दिनुभएको छ ।
राष्ट्रिय विपद् जोखिम न्यूनीकरण तथा व्यवस्थापन प्राधिकरणका कार्यकारी प्रमुख दिनेश भट्टले काभ्रेको लागि हालै ७ करोड ३५ लाख ७५ हजार रकम विनियोजन भएको जानकारी दिँदै विस्तृत क्षति आंकलनपछि स्थायी आवास निर्माण का लागि भुक्तानी गर्न सकिने बताउनुभयो ।
रोशी गाउँपालिकाका अध्यक्ष दिनेश लामाले विपदबाट प्रभावित स्थानीय तहहरु मध्ये रोशी गाउँपालिकाबाट क्षति आंकलन सुरु गरेर पुनर्निर्माणको काम थालेकोमा संघीय सरकार र विपद जोखिम न्यूनीकरण तथा व्यवस्थापन प्राधिकरणलाई आभार प्रकट गर्नुभएको छ ।
रोशी गाउँपालिकामा १० शैयाको अस्पताल, औद्योगिक ग्रामको प्रशासकीय भवन, डम्फु जीवन्त संग्रहालय लगायत नगर गौरवका आयोजना, पाँचवटा झुलुंगे पुल बगाएको बताउनुहुदै तत्काल पुननिर्माण नगरे विद्यालय जान नसकेर बालबालिकाहरू शिक्षाबाट वञ्चित हुनुपर्ने अवस्था बन्ने बताएउनुभयो । पुननिर्माणसँगै जीविकोपार्जनमा पनि योजनाहरू आउनुपर्ने बताउनुभयो ।
रोशी गाउँपालिकाका उपाध्यक्ष मिमबहादुर वाइबाले पालिकाका धेरैले धनजनको क्षति बेहोरेको भन्दै उनीहरूको पीडामा मलम लाउने काममा संघीय सरकारले भूमिका खेल्ने अपेक्षा गर्नुभयो ।
विस्तृत क्षति आंकलनका लागि रोशी गाउँपालिकाबाट तीन वटा क्लस्टरमा र संयुक्त राष्ट्रसङ्घीय विकास कार्यक्रम (युएनडिपी)को सहयोगमा राष्ट्रिय विपद् जोखिम न्यूनीकरण तथा व्यवस्थापन प्राधिकरणबाट समेत गरी २२ जना प्राविधिक खटिने बताइएको छ । स्थलगत मूल्याङ्कनपछि प्राविधिकले दिने प्रतिवेदनका आधारमा प्राधिकरणले लाभग्राही यकिन गरेर रकम उपलब्ध गराउँछ।
