काभ्रे,रेडियो रोशी,
भोलि आइतवारदेखि देशभरका झन्डै साढे ३ लाख बालिकालाई पाठेघरको मुखको क्यान्सरविरुद्ध (एचपीभी) खोप लगाईदैछ । यसै अन्तर्गतरोशी गाउँपालिकामा भने पर्सि माघ २६ देखी २९ गतेसम्म पाठेघरको मुखको क्यान्सर बिरुद्धको एचपीभी खोप अभियान सञ्चालन हुने भएको छ । गाउँ कार्यपालिकाको कार्यालयले एक सूचना जारी गर्दै माघ २६ गतेदेखि २९ गतेसम्म पालिका भित्रका विभिन्न विद्यालय तथा स्वास्थ्य संस्थाहरूमा खोप केन्द्र तोकेर अभियान सञ्चालन गर्न लागेको जानकारी दिएको छ ।
कक्षा ६ मा पढ्ने तथा १० वर्ष पुगेका बालिकाहरुलाई खोप लगाईने छ । गएको वर्ष खोप अभियानमा छुटेका कक्षा ७ देखि १० सम्मका छात्रा तथा विद्यालय बाहिरका ११ देखि १४ वर्षका किशोरीलाई पनि खोप दिइनेछ । खोप कार्यक्रम प्रत्येक वडाका तोकिएका स्वास्थ्य संस्था र विद्यालयहरूमा बिहान १०ः३० बजेदेखि दिउँसो ३ः०० बजेसम्म सञ्चालन हुनेछ।
प्रमुख प्रशासकीय अधिकृत टंक बहादुर नेगीद्वारा हस्ताक्षरित सूचनामा, खोप केन्द्र तोकिएका विद्यालयहरूलाई स्वास्थ्यकर्मीहरूसँग आवश्यक समन्वय र व्यवस्थापन गर्न आग्रह गरिएको छ। पाठेघरको मुखको क्यान्सरको जोखिम न्यूनीकरण गर्न यो खोप अत्यन्त प्रभावकारी मानिने हुनाले आफ्ना बालबालिकालाई नजिकैको केन्द्रमा लगी खोप लगाउन गाउँपालिकाले सबै अभिभावकहरूमा अनुरोध गरेको छ।
जारी सूचना अनुसार माघ २६ गते वडा नं. १ को चेतना मा.वि., वडा नं.२ को लक्ष्मी नारायण मा.वि., वडा नं.३ को देवी मा.वि., वडा नं.४ को नागदेवि मा.वि., वडा नं.५ को भूमेस्थान मा.वि., वडा नं.६ को हरिसिद्धि मा.वि. र हिमालय मा.वि., वडा नं.७ को गौतमबुद्ध आ.वि. वडा नं.८ को इन्द्रोदय आ.वि., वडा नं.९ को विन्ध्यवासिनी मा.वि. र मंगल जनविजय मा.वि., वडा नं.१० को पञ्चकन्या मा.वि., वडा नं.११ को पोक्रा मा.वि. वडा नं.१२ को गणेश मा.वि.मा खोप अभियान सञ्चालन हुने छ।
त्यसैगरि माघ २७ गते वडा नं.४ को जोगेश्वर मा.वि., वडा नं.६ को कालिदेवि आ.वि., वडा नं.७ को रोशी मा.वि., वडा नं.११ को जुगेश्वर मा.वि. र वडा नं.१२ को विन्ध्यवासिनी आ.वि.मा खोप अभियान सञ्चालन हुने छ ।
त्यस्तै माघ २८ गते वडा नं.७ को प्रगति किरण इंग्लिस स्कुल र वडा नं.११ को श्रीकृष्ण आ.वि. तथा माघ २९ गते वडा नं.११ को भिमेश्वर मा.वि.मा खोप अभियान सञ्चालन हुने छ ।
खोप लगाउन छुटेका एवं विद्यालय नजाने छात्राहरुकोे हकमा भने वडा नं. १ मा खहरेपाँगु स्वास्थ्य चौकी, वडा नं. २ मा शिखर आम्बोटे स्वास्थ्य चौकी, वडा नं. ३ मा शिखर आम्बोटे सा. स्वास्थ्य ईकाई, वडा नं. ४ मा महादेवटार स्वास्थ्य चौकी, वडा नं. ५ मा सिसाखानी स्वास्थ्य चौकी, वडा नं. ६ मा सिन्किलेक सा. स्वास्थ्य ईकाई र सिपाली चिलाउने स्वास्थ्य चौकी, वडा नं. ७ मा कटुञ्जेबेशी स्वास्थ्य चौकी, वडा नं. ८ मा खार्पाचोक स्वास्थ्य चौकी, वडा नं. ९ मा मंगलटार सा. स्वास्थ्य ईकाई र मंगलटार स्वास्थ्य चौकी, वडा नं. १० मा वाल्टीङ स्वास्थ्य चौकी, वडा नं. ११ मा भिमखोरी स्वास्थ्य चौकी र वडा नं. १२ मा भिमखोरी सा. स्वास्थ्य ईकाईमा खोप अभियान सञ्चालन हुने छ ।
एचपीभी खोपलाई सरकारले नियमित राष्ट्रिय खोप कार्यक्रममा समावेश गरिसकेको छ । गएको वर्ष झन्डै १६ लाख किशोरीलाई एचपीभी खोप दिइएको थियो । अभियानमा ९४ प्रतिशतले खोप लगाएका थिए । पाठेघरको मुखको क्यान्सर नेपालमा महिलाको ज्यान जाने प्रमुख कारणमध्ये एक हो । यो क्यान्सर मुख्यतः ह्युमन पापिलोमा भाइरसको संक्रमणबाट हुने गर्छ । भाइरस छालाको सम्पर्कबाट सजिलै सर्ने भएकाले खोप नै सुरक्षित उपाय भएको डाक्टरहरुको भनाइ छ ।
