काभ्रे,रेडियो रोशी,
रोशी गाउँपालिकाका दुई वटा वडामा रहेका फरक क्षमता भएका व्यक्तिहरूका लागि सीपमूलक तालिम प्रदान गरिएको छ । ‘दृष्टिविहीन व्यक्तिहरूको एकीकृत सामुदायिक विकास केन्द्र’ को आयोजना तथा सामाजिक विकास कार्यालय, धुलिखेलको आर्थिक सहयोगमा माघ २८ गतेबाट सुरु भएको तालिम शनिबार १२ नं वडा कार्यालयमा सम्पन्न भएको हो ।
पालिकाको ११ र १२ नम्बर वडाका फरक क्षमता भएका व्यक्तिहरूलाई आत्मनिर्भर बनाउन झोल साबुन, फिनेल लगायतका सरसफाइ सामग्री निर्माण सम्बन्धी तालिम प्रदान गरिएको हो । तालिममा रोशी ११ र १२ का दश–दश जना गरि २० जना फरक क्षमता (दृस्टिबिहिन, शारीरिक अशक्तता) भएका व्यक्तिहरू सहभागि भएका थिए ।
फरक क्षमता भएका व्यक्तिहरूमा सीप बिकास गरि आत्मनिर्भर बन्न सहयोग पुगोस भन्ने उद्देश्यले तालिम प्रदान गरिएको गाउँपालिका प्रबक्ता एवम् वडा नं १२ वडा अध्यक्ष बसन्त कुमार तामाङले जानकारि दिनुभयो ।
उत्पादित सामग्रीहरु आवश्यकता परेमा बजारिकरणमा समेत सहयोग गरिने दृष्टिविहीन व्यक्तिहरूको एकीकृत सामुदायिक विकास केन्द्रका अध्यक्ष कृष्ण तामाङले बताउनुभयो ।
तालिम समापन कार्यक्रममा सहभागीहरूले यस्ता सीपमूलक तालिमले आफूहरूमा आत्मविश्वास बढाएको र आयआर्जनको राम्रो स्रोत बन्ने बताएका छन् ।
