काभ्रे,
काभ्रे जिल्लाको रोशी गाउँपालिकाले उच्च शिक्षा अध्ययन गरिरहेका पालिका भित्रका ७ जना दलित विद्यार्थीलाई आर्थिक सहयोग गरेको छ । दलित उत्थान कार्यक्रम अन्तर्गत स्नातक तहमा अध्ययनरत ७ जना दलित विद्यार्थीलाई प्रोत्साहनस्वरूप वार्षिक शैक्षिक शुल्क गाउँपालिकाले व्यहोरेको हो । गाउँपालिकाले सार्वजनिक सूचना प्रकाशित गरी आवेदन आह्वान गरेकोमा १० जनाले निवेदन दिएका थिए। तीमध्ये ७ जना छनोट गरी सहयोग प्रदान गरिएको पालिकाको शिक्षा शाखाले जनाएको छ।
शिक्षा शाखाको अनुसार रोशी–१० का मुना विश्वकर्मा, अनिता विश्वकर्मा र काजल सेञ्चुरी, रोशी–८ की सञ्जना विक, रोशी–९ की सम्झना सेञ्चुरी तथा रोशनी सुन्दास र युगबहादुर दमाईलाई आर्थिक सहयोग प्रदान गरिएको हो । उनीहरु अध्ययनरत सम्बन्धित शैक्षिक संस्थाको खातामा शुल्क जम्मा गरिसकिएको बताईएको छ ।
सहयोग प्राप्त विद्यार्थीमध्ये मुना, अनिता, काजल, रोशनी र युगबहादुर शिक्षा संकायमा, सञ्जना मानविकीमा तथा सम्झना कम्प्युटर एप्लिकेसन विषयमा अध्ययनरत छन् ।
आर्थिक अभावका कारण दलित समुदायका विद्यार्थी उच्च शिक्षाबाट वञ्चित हुन नपरोस् भन्ने उद्देश्यले यो कार्यक्रम सञ्चालन गरिएको गाउँपालिका अध्यक्ष दिनेश लामाको भनाई छ । आगामी बर्षमा पनि यो कार्यक्रमले निरन्तरता पाउने बताउनुहुदै दलित समुदायको शैक्षिक स्तर अभिवृद्धिसँगै आर्थिक सशक्तीकरणका कार्यक्रम पनि सञ्चालन हुँदै आएको अध्यक्ष लामाले बताउनुभयो ।
