च्याम्राङ्बेशीका २२५ किसानलाई दुधमा प्राप्त अनुदान रकम वितरण सुरु

काभ्रे,

बेथानचोक गाउँपालिकाका किसानहरुलाई दुधमा प्राप्त अनुदान रकम वितरण सुरु भएको छ । हिजोबाट वडा नम्बर–१ च्याम्राराङ्बेशीका २२५ किसानहरुलाई अनुदान रकम वितरण कार्यक्रमको सुरुवात भएको हो । बागमती प्रदेश कृषि तथा पशुपन्छी मन्त्रालयद्वारा पशुपालक किसानलाई दुधमा प्राप्त अनुदान र बेथानचोक गाउँपालिकाको अनुदानमा दुध लिटर अनुदानमा च्याम्राङ्बेशीका २२५ किसानहरुका लागि हिजोबाट उक्त रकम वितरण शुरु भएको बेथानचोक वडा नम्बर–१ का वडा अध्यक्ष तथा गाउँपालिकाका प्रवक्ता मधुसुदन तिमल्सिनाले जानकारी दिनुभयो ।
च्याम्राराङबेशीमा आर्थिक बर्ष २०७७÷७८ मा ८ लाख २७ हजार ५३८ लिटर दुध उत्पादन भएको नबप्रतिभा बहुमुखी सहकारीका अध्यक्ष माधवप्रसाद दाहालले जानकारी दिनुभयो । नबप्रतिभा सहकारी मार्फत रकम बितरण भएकाले उक्त सहकारीमा पुगी रकम बुझिलिन सम्पुर्ण किसानलाई वडा नम्बर १ कार्यालयले अनुरोध गरेको छ। प्रदेश सरकारको तर्फबाट १३ लाख ५५ हजार ५०७ रुपैंया अनुदान बापतको रकम प्राप्त भएको वडा अध्यक्ष तिमल्सिनाले बताउनुभयो । उहाँले किसान र कृषि क्षेत्रमा गाउँपालिका र वडा कार्यालयले सक्दो सहयोग र अनुदानका कार्यक्रम ल्याउदै जाने बताउनुभयो । बागमती प्रदेश सरकारले दुधमा अनुदानका लागि १६ करोड रुपैया छुट्याएको छ।