काभ्रे,
काभ्रेमा आयोजना भएको खुल्ला राष्ट्रिय फुटसल प्रतियोगिताको उपाधि अनेरास्ववियु काभ्रेले हात पारेको छ । धुखमी धुलिखेल समूहलाई हराउँदै अनेरास्ववियुले उपाधि चुम्न सफल भएको हो । राष्ट्रिय युवा संघ नेपाल काभ्रेको आयोजनामा शुक्रबार र शनिबार गरि दुईदिन प्रतियोगिता संचालन भएको थियो । प्रतियोगितामा विजेता समूहले नगद ५० हजारसहित ट्रफी, मेडल र प्रमाणपत्र प्राप्त गरेको छ । त्यसैगरि उप विजेता समूह धुखमीले नगद २५ हजारसहित मेडल र प्रमाणपत्र प्राप्त गरेको छ । विजेता र उप विजेता तथा सहयोगीहरुलाई नेकपा एमाले काभ्रेका अध्यक्ष अशोक ब्याञ्जु, राष्ट्रिय युवा संघका केन्द्रीय उपाध्यक्ष अमित लामा, जिल्ला अध्यक्ष ईश्वर बल्धव सापकोटा लगायतका नेताहरुले पुरस्कार वितरण गर्नु भएको थियो ।
समापन कार्यक्रममा उत्कृष्ट खेलाडी तथा सहयोगीहरुलाई प्रशंसापत्रद्वारा सम्मान गरिएको थियो । पूर्वमन्त्री तथा नेकपा एमाले पोलिटब्युरो सदस्य गोकुल बास्कोटाले प्रतियोगिताको उद्घाटन गर्नु भएको थियो । ४७ टिमको सहभागिता रहेको उक्त कार्यक्रममा विभिन्न स्थानबाट फुटसल प्रतिस्पर्धामा भाग लिएका थिए । राष्ट्रिय रेफ्रि रोजन श्रेष्ठ मुख्य रेफ्रिका रुपमा रहनुभएको थियो । फुटसलमा यति धेरै समूह सहभागी भएको पहिलो भएको युवा संघका सचिव सिवी लामाले बताउनुभयो ।
