काभ्रे,
निजी तथा आवासीय विद्यालय संगठन काठमाडौं (प्याब्सक) ले मंगलबारदेखि दुई दिनसम्म फुटसल आयोजना गर्ने भएको छ । संगठनले आज काठमाडौंमा पत्रकार सम्मेलन गर्दै फुटसल प्रतियोगिताबारे जानकारी गराएको हो । संगठनका अध्यक्ष गेन्द्र लामाले दुई दिन सम्म चल्ने प्रतियोगितामा ३२ वटा विद्यालयका विद्यार्थीहरूको टीम सहभागी हुने बताउनुभएको छ । भाटभटेनी फुटसल ग्राउण्ड चुच्चेपाटीमा हुने प्रतियोगिताको तयारी भइरहेको प्याब्सकका महासचिव राजन श्रेष्ठ ‘धरातल’ ले जानकारि दिनुभयो । प्रतियोगितामा प्याब्सन सदस्य विद्यालयले मात्रै सहभागिता जनाउन पाउने श्रेष्ठको भनाई छ । विद्यार्थीको सीप विकास गर्ने उद्देश्यले प्याब्सकले यस प्रकारका कार्यक्रम आयोजना गर्दै आएको पनि महासचिव श्रेष्ठले जानकारि दिनुभयो ।
प्रतियोगितामा प्रथम हुने टिमले १० हजार रुपिँया नगद सहित ट्रफी र प्रमाणपत्र, दोस्रो हुने टिमले ५ हजार नगद सहित ट्रफी र प्रमाणपत्र तथा तेस्रो हुने टिमले ३ हजार नगद सहित ट्रफी र प्रमाणपत्र पाउने आयोजक समितिका संयोजक राजु पुडासैनीले जानकारी दिनुभयो । अठार वर्षअघि स्थापना गरिएको प्याब्सकले पटक–पटक शैक्षिक सहित सिर्जनात्मक कार्यक्रम गर्दै आएको पत्रकार सम्मेलनमा जानकारी दिइएको थियो । प्याब्सकले यसअघि प्रिन्सिपल बीच पनि फुटसल प्रतियोगिता गराएको थियो । विद्यार्थीबीच खेलाइने यो सातौं प्रतियोगिता भएको आयोजकले जनाएको छ । प्याब्सकमा काठमाडौँको उत्तरी बेल्टका ४० भन्दा बढी निजी तथा आवासीय विद्यालयहरू समावेश छन् ।
