काभ्रे,
रोशी गाउँपालिकाको आयोजनामा आज मातृ भाषा शिक्षा (ताामाङ) सम्बन्धी छलफल तथा अन्तरकृया कार्यक्रम सम्पन्न भएको छ । गाउँपालिकाको कार्यालय अमलटारमा भएको उक्त कार्यक्रममा कार्यक्रमको सभापति तथा रोशी गाउँपालिकाको अध्यक्ष दिनेश लामाले तामाङ मातृभाषाको शिक्षा कार्यन्वयन गर्ने सवालमा उठेका सकारात्मक सुझावहरुलाई स्वीकार गर्दै यसलाई प्रभावकारी ढंगले कार्यन्वयन गर्ने सम्बन्धमा रोशी गाउँपालिका विश्वस्त रहेको बताउनुभयो ।
उपाध्यक्ष मिम बहादुर वाईवा ज्वालाले यस कार्यक्रमको निम्ति उत्प्रेरित गर्ने अमूल्य सल्लाह तथा सुझावहरु अभिब्यक्त गर्ने शिक्षक, प्र.अ. शिक्षा विद्, तथा सम्पूर्ण सरोकारवाला निकायहरुलाई धन्यवाद व्यक्त गर्नुभएको छ । भाषा विकास, शैक्षिक गुणस्तर तथा प्रभावकारिताको निम्ति पालिकाले निभाउनुपर्ने भूमिका प्रति प्रतिबद्ध रहेको बताउँनुभयो ।
उक्त कार्यक्रमको अवसरमा प्राध्यापक डाक्टर मुक्त सिं तामाङले मानव सभ्यताको संरक्षण गर्न बहुभाषा, बहुसंस्कार र संस्कृतिको समान ढंगले अगाडि ल्याउदै सिर्जनशील र सु संस्कृत समाजको निर्माण गर्न सम्पूर्ण निकाय जागरुक हुनुपर्ने बताउँनुभयो ।
भाषा विद डुप वाङ्गेल लामाले राज्यले दिएको अधिकारको सदुपयोग गरी शिक्षाको क्षेत्रमा गुणस्तरीयता थप गर्नको निम्ति अनुरोध गर्नुभएको छ । सोही कार्यक्रमको अवसरमा आफ्ना धारणाहरु व्यक्त गर्दे विद्यालय व्यवस्थापन समितिको महासचिव गुणराज मोक्तानले संविधानको कार्यन्वयनको चरणमा रोशी गाउँपालिकाले आफ्ना ए्ेन, नियम, कानुन तथा कार्यविधि स्पष्ट गर्न जरुरी रहेको बताउनुभयो ।
मातृ भाषामा शिक्षा हो वा मातृभाषाको शिक्षा हो ? यो स्पष्ट हुन जरुरी रहेको बताउँनुभयो । कार्यन्वयन गर्ने चरणमा केही रणनीति, अभिभावकको सुझाव, तामाङ भाषा भित्रको विविधतालाई समेट्नको स्पष्ट रुपले समेट्नको निम्ति आग्रह गर्नुभएको छ । त्यसैगरी मातृभाषा एवं शिक्षा विज्ञ डा. लोक बहादुर लोप्चनले भाषा बचाउनका निम्ति विद्यालयमा मातृभाषा तथा बहुभाषिक हुनुुपर्ने कुरामा जोड दिनुभएको छ । कार्यक्रममा नेपाल तामाङ घेदुंङ संघको प्रतिक ङेसुर, अन्तराष्टिय तामाङ परिषदका वरिष्ठ उपाध्यक्ष टसी लामा, प्रमुख प्रशासकिय अधिकृत राम बहादुर तामाङ, वडा अध्यक्षहरु, प्रधानाध्यापक तथा शिक्षकहरुको उपस्थिति रहेको छ ।
