काभ्रे,
राहदानी बनाउन राष्ट्रिय परिचयपत्रको नम्बर अनिवार्य गरिएपछि जिल्ला प्रशासन कार्यालय काभ्रेपलाञ्चोकमा राष्ट्रिय परिचय पत्र बनाउने सेवाग्राही मध्यरातदेखि नै लाइन लाग्न बाध्य भएका छन् । रातभरी लाइनमा अनिदो भएर बस्नुपर्दा घाँटी दुख्ने, रुघा लाग्ने जस्ता समस्या देखिन थालेको सेवाग्राहीको गुनासो छ ।
सेवाग्राहीको भिड बढेपछि जिल्ला प्रशासन कार्यालय काभ्रेले बिहान ७ बजेदेखि बेलुका ७ बजेसम्म सेवा दिइरहेको छ । तर पनि सेवाग्राहीको भिड कम भएको छैन । दैनिक ८० जनाको मात्रै क्षमता भएपनि १ सय ४० जनाको परिचयपत्र बनाउने गरिएको छ । सहज सेवाका लागि स्टेशन थप्नुको विकल्प नभए पनि थप स्टेशनका लागि जनशक्ति अभाव रहेको प्रमुख जिल्ला अधिकारी हुमकला पाण्डेले बताउनुभयो ।
