काभ्रे,
रोशीका कृषकहरुलाई जडिबुटि तथा फलफूल बगैँचा प्रवर्धन तालिम प्रदान गरिएको छ । रोशी गाउँपालिकाको कृषि विकास शाखा मार्फत सञ्चालन गरिएको उक्त तालिममा जडिबुटिको परिचय, महत्व, रोशीको भौगोलिक अवस्था अनुसार जडिबुटी खेतीको सम्भावना सम्बन्धि तालिम प्रदान गरिएको कृषि विकास शाखाका प्रमुख समिता तामाङले जानकारी दिनुभयो । साथै कुरिलो खेतीप्रविधि, कुरिलोको महत्व, कुरिलो खेतीका लागि आवश्यक हावा, पानी, माटो, जात लगायत यसको नर्सरी स्थापना, रोप्ने समय,तरिका तथा दीगो उत्पादनका लागि व्यवस्थापनका विधिहरु लगायत रोग कीराको बारेमा जानकारी दिई नियन्त्रणका बारेमा कृषकहरुलाई जानकारी प्रदान गरिएको थियो ।
फलफूल बगैँचा प्रवर्धन तर्फ फलफूल खेतीको महत्व, रोशीको भौगोलिक अवस्थाअनुसार फलफूल खेतीको सम्भावना, फलफूल बगैँचा स्थापना गर्दा ध्यान दिनुपर्ने कुराहरु, बगैचा रेखांकनका विधिहरु लगायतयसको प्रवर्धनकालागि गर्नुपर्ने व्यवस्थापनका कार्यहरुको बारेमा कृषकहरुलाई तालिम प्रदान गरिएको कृषि शाखाका प्रमुख समिता तामाङले जानकारी दिनुभयो । २ दिन सम्म प्रदान गरिएको उक्त तालिममा रोशी गाउँपालिका वडा नं ५, ६, ७, ९ र ११ का कृषकहरुको सहभागिता रहेको थियो ।
