काभ्रे,
स्थानीय निर्वाचनको ताका रोशीलाई समृद्ध बनाउने विभिन्न आधार सहितको परिकल्पना बोकेर चुनावको लडाईमा होमिएको नवनिर्वाचित जनप्रतिनिधिहरुको कार्य मूल्यांकन गर्दा रोशी गाउँपालिकाले पनि तीब्र गतिमा आफ्ना प्रतिवद्धतालाई पूर्णता दिइरहेको पाइएको छ । गाउँपालिकाले नेपालको संविधान २०७२ ले परिकल्पना गरेको दीगो शान्ति, सुशासन, विकास र समृद्धिको आकांक्षा पूरा गर्न, स्थानीय जनताको जनजीविकामा आमूल परिवर्तन ल्याउन गरिएको प्रतिवद्धताहरुलाई पूर्णता दिइरहेको छ । गाउँपालिका अध्यक्ष दिनेश लामाले आफू निर्वाचित भए पश्चात् गरिएको पहिलो प्रतिवद्धता थियो —निःशुल्क ज्येष्ठ नागरिक स्वास्थ्य विमा कार्यक्रम सञ्चालन गर्ने । हाल गाउँपालिकाको १२ वटै वडामा यो कार्यक्रम अगाडि बढिरहेको छ । प्रत्येक वडामा एक जना अभिकर्ता परिचालन गरिएको छ ।
अभिकर्ता चेत बहादुर लामाले रेडियो रोशीसँग कुरा गर्दै भन्नुभयो “रोशी गाउँपालिका भरिको ६० वर्ष भन्दा माथिको निःशुल्क रुपमा सबै ज्येष्ठ नागरिकको विमा गर्ने अभियानमा हामी लागिरहेका छौँ जसमा प्रत्येक वडामा हामी १ जनाको दरले परिचालित छौँ । विशुद्ध रुपमा ज्येष्ठ नागरिकको मात्र नभई १ परिवारमा १ जना ज्येष्ठ नागरिकको विमा गर्दा सो परिवारको अन्य ४ जना सदस्यको पनि निःशुल्क रुपमा विमा हुने छ”
त्यसैगरी अर्को अभिकर्ता मुकुमाया लामाका अनुसार स्वास्थ्य विमा गर्दा स्वास्थ्य उपचारमा पर्ने आर्थिक भारलाई न्यूनिकरण गर्नका निमित्त यो कार्यक्रमले महत्वपूर्ण भूमिका खेलेको बताउनुभयो । जसमा आकस्मिक सेवा, बहिरङ्ग, अन्तरङ्ग, एच.आइ.भि., हेपटाइटिस, कुष्ठारोग, क्यान्सर लगायत स्वास्थ्य क्षेत्रमा पर्ने असर र त्यसको आर्थिक भार न्यूनिकरण गर्न स्वास्थ्य विमा कार्यक्रम अत्यन्त प्रभावकारी रहेको बताउनुभयो । “आफ्नो विमा गरिसकेको रोशी ९ को ज्येष्ठ बुवामानसिंङ तामाङले भन्नुभयो । साँच्चै सिंहदवार गाउँगाउँमा आएको अनुभव भएको छ । घरघरमा आएर हाम्रो विमा गरिदिनुभएकोमा रोशी सरकारलाई धन्यवाद व्यक्त गर्दछु । मैले त मेरो मात्र स्वास्थ्य रक्षा होला भन्ठानेको थिएँ । मेरो मात्र नभइ मेरो परिवारको पनि निःशुल्क रुपमा विमा हुँदा म एकदम खुसी छु ” । अर्का ज्येष्ठ आमा माया तामाङका अनुसार “उमेर ढल्कदै गएपछि अनेक रोग लाग्ने आफ्नो स्वास्थ्यको चिन्ता त छ दै छ उपचार गर्ने पैसा कहाँबाट जुटाउने होलाभन्ने चिन्ताले सधै पिरोल्थो रोशी सरकारले गरेको कामले अहिले ढुक्क छु । ”
२०७८ सालको प्रारम्भिक नतिजा अनुसार गाउँपालिकाभित्र जम्मा घरधुरी संख्या ६०३९ रहेको छ । जम्मा जनसंख्या २३,५५१ जना रहेको छ भने लगभग ज्येष्ठ नागरिक ३,७०० जना रहेको छ । यसरी ३,७०० ज्येष्ठ नागरिक र १४,८०० जना अन्य परिवारको सदस्य गर्दा जम्मा १८,५०० जना रोशीवासीको विमा हुने भएको छ ।
