रोशी गाउँपालिकाको शैक्षिक गुणस्तर सुधारका लागि प्रधानाध्यापक, वि.व्य.स. अध्यक्ष र गाउँपालिका प्रतिनिधिबिच छलफल, अन्तरकृया तथा गोष्ठि कार्यक्रम सम्पन्न भएको छ । पालिका अन्तर्गतका विद्यालयहरुको संस्थागत क्षमता विकास तथा शैक्षिक गुणस्तर सुधारका लागि उक्त कार्यक्रम आयोजना गरिएको शिक्षा शाखाका प्राविधिक सहायक राजेन्द्र सिग्देलले जानकारी दिनुभयो । रोशी गाउँपालिकाको सभाहलमा भएको उक्त कार्यक्रममा गाउँपालिकाको ६९ ओटै विद्यालयको प्रधानाध्यापक द्धारा विद्यालयको शैक्षिक, भौतिक अवस्थाका साथै समस्या तथा समस्या समाधानका उपायहरुको बारेमा प्रतिवेदन प्रस्तुत गरिएको हो । रोशी गाउँपालिकाको भावी शिक्षानीतिको मस्यौदा तयार गर्न विद्यालयसँग सम्बधित सरोकारवाला निकायसँग प्रत्यक्ष रुपमा सुझाव संकलन गरिएको प्रा.स. सिग्देलले जानकारी दिनुभयो । कार्यक्रमको अवसरमा रोशी गाउँपालिकाको अध्यक्ष दिनेश लामाले विद्यालयको गतिविधिबारे केही सत्यता र केही आरोपहरु छन् ती सबैलाई विषयलाई तथ्यपूर्ण ढंगले विश्लेषण गदैै अगाडि बढ्ने बताउनुभयो । मातृभाषा र अंग्रेजी भाषाका विषयमा भएका सुझावहरुलाई विश्लेषण गर्दै सहि ढंगले प्राथमिकता प्रदान गर्ने, गाउँपालिका र विद्यालय बीच भएको २० बुँदे सम्झौता अनुरुप शिक्षकहरुको प्रस्तुति र उपलब्धि बारे मापनगर्ने बताउनुभयो । विद्यालयमा बेथिति र नेक्जिेन्स भएको र यसको गहन ढंगले मापन गर्ने बताउनुभयो ।
त्यसैगरी सामाजिक विकास समितिको संयोजक अशोक गौतमले विद्यालयको समस्या र अवस्थालाई मध्यनजर गरेर शिक्षा नीतिको निम्ति गृहकार्य गरिरहेको र रोशीको शैक्षिक गुणस्तर अभिवृद्धि गर्न दरबन्दी घटाउने, विद्यालय मर्ज गर्ने, विद्यार्थी संख्या नभएको विद्यालयमा कक्षा घटाउने जस्ता विषयमा अवलोकन अनुगमन गर्दै अगाडि बढ्ने कुरामा जोड दिनुभयो ।
कार्यक्रमका अवसरमा प्रमुख प्रशासकिय अधिकृत रामबहादुर तामाङले कार्य सम्पादनका सूचकहरुको विषयमा छलफल गरिएको थियो जसमा तहगत, कक्षागत सिकाई उपलब्धि तयार गर्ने, तोकिएको ढाँचा र समयमा सामाजिक परीक्षण तथा लेखा परिक्षण गरि अभिभावक भेलामा प्रस्तुत गर्ने, विद्यालयको गतिविधिमा सुशासन र पारदर्शिता कायम गर्ने गराउने विषयमा छलफल भएको हो । सो कार्यक्रमसँगै गाउँपालिका र विद्यालयका प्रधानाध्यापकहरुबीचको कार्यसम्पादन सम्झौता पत्र आदानप्रदान कार्यक्रम पनि सम्पन्न भएको प्राविधिक सहायक सिग्देलले जानकारी दिनुभयो ।
