काभ्रे,
रोशी गाउँपालिका वडा नं. ७ मा अवस्थित कटुञ्जे प्रहरी चौकीको नवर्निमित भवन उद्धाटन भएको छ । बुधबार एक कार्यक्रमकाबीच बागमती प्रदेश प्रहरी प्रमुख डिआइजी किरण राणाले उद्घाटन गर्नुभएको हो ।
भवनको उद्घाटन गर्दै डिआईजी राणाले भवनसँगै सेवा गुणस्तरीय र विश्वसनीय बनाउन निर्देशन दिनुभयो । ‘प्रहरीले आफै असुविधामा बसिरहँदा पनि नागरिक प्रति उपलब्ध गराउनु पर्ने सेवामा कहिल्यै कमी र गुनासो गरेन’–डिआइजी राणाले भन्नुभयो–‘भवन र सुविधा सम्पन्न साधन श्रोत नहुँदा त गुणस्तरीय सेवा उपलब्ध गराएको नेपाल प्रहरीले भवन र साधन श्रोत पर्याप्त उपलब्ध हुँदा सेवाको गुणस्तरमा छलाङ मार्नु पर्छ ।’ अपराध न्यूनीकरण, दुर्घटना न्यूनीकरण कार्यक्रम निरन्तर जारी राख्न निर्देशन दिँदै डिआइजी राणाले एकीकृत गस्ती योजना २०८० प्रकाशन पछि प्रहरीले गर्ने गस्तीको प्रोटोकल र अवस्थामा केही परिवर्तन हुने बताउनुभयो ।
कार्यक्रममा सहायक प्रमुख जिल्ला अधिकारी आनन्द पौडेलले प्रहरीले बोकेको नारा सत्यम, सेवक सुरक्षणलाई ब्यवहारत कार्यान्वयन गर्नु पर्ने बताउनुभयो ।
कटुञ्जे पछि कानपुर र बनेपाको साँगामा रहेको प्रहरी चौकी निर्माणको अन्तिम चरणमा रहेकाले समुद्धाघाटन गरी सेवा प्रभाव गर्न सकिने एसपी भाग्येन्द्र पुरुष ढकालले बताउनुभयो ।
सोही कार्यक्रममा नेपाल प्रहरी प्रदेश कार्यालय बनेपाका प्रमुख एसएसपी किसन सिंह थापा, एसपी ईश्वर थापा, नेपाल पत्रकार महासंघ काभ्रे शाखाका अध्यक्ष बद्रीराज तिमल्सिना, रोशी गाउँपालिका वडा नम्वर ७ का अध्यक्ष अशोककुमार गौतम लगायतले प्रहरी कार्यालयको भवनबाट गुणस्तरीय सेवा प्रभाव गर्न सहज भएको बताएका थिए ।
कार्यक्रममा प्रहरी चौकी निर्माणका लागि जग्गादान गर्ने जग्गादाता मानकुमारी गौतम र शिवनारायण श्रेष्ठ तथा निर्माण व्यवसायी राहुल कन्स्ट्रक्सन राहुल श्रेष्ठलाई सम्मान गरिएको थियो । प्रहरी चौकी भवन निर्माणका लागि गौतमले १ रोपनी ६ आना १ पैसा १ दाम र श्रेष्ठले १ रोपनी ४ आना ३ दाम १ पैसा जग्गा निःशुल्क उपलब्ध गराएका थिए । २ रोपनी ११ आना क्षेत्रफलमा बनेको उक्त प्रहरी चौकी साढे २ तल्लाको छ ।
जसमा प्रहरी ब्यारेक महिला र पुरुषका लागि अलग अलग निर्माण गरिएको छ भने हिरासत पनि अलग अलग निर्माण गरिएको छ । शौचालय, भान्सा तथा अन्य आवश्यक पूर्वाधार निर्माण गरिएको बताइएको छ । उक्त भवन निर्माणका लागि विभिन्न चरणमा गरेर २ करोड २७ लाख रुपैयाँ खर्च भएको छ । हाल रोशी गाउँपालिकाका चार वटा वडा हेर्ने जिम्मेवारी प्राप्त गरेको कटुञ्जे प्रहरी चौकी माओवादीको द्वन्द्वमा विस्थापित भई पछि पुर्न स्थापना भएको थियो ।
