काभ्रे,
काभ्रे जिल्लाको रोशी गाउँपालिकाले पालिका भित्रका दलित बिद्यार्थीहरुलाई प्राविधिक शिक्षा, उच्च शिक्षा र लोक सेवा तयारी कक्षाका लागि प्रोत्साहन स्वरुप आर्थिक सहयोग गरेको छ । पालिकाले प्रोत्साहन स्वरुप प्रतिव्यक्ति ३२ हजार २ सयका दरले ६ जना बिद्यार्थीहरुलाई आर्थिक सहयोग वितरण गरेको हो ।
आर्थिक सहयोग पाउने बिद्यार्थीहरुमा मंगल जनविजय माध्यामिक विद्यालयमा ३ बर्षे सिभिल इञ्जीनीयर अध्यायन गर्ने रोशी–९ का युगबहादुर दमाई रहेका छन् । उनलाई प्राविधिक शिक्षा अध्ययनका लागि आर्थिक सहयोग वितरण गरिएको हो ।
त्यसैगरी, पिपुल्स बहुमुखी क्याम्पसमा बिबिएस अध्यायनरत रोशी–१ का सुजिना विकलाई लोक सेवा तयारीका लागि, मंगलजनविजय माध्यामिक विद्यालयमा ३ बर्षे इञ्जीनीयर अध्यायनरत रोशी–११ कि शुभद्रा नेपाली, रोशी–१२ का सुजन विक, रोशी–१० का निरोज विक र रोशी–९ की रोशनी सुन्दासलाई आर्थिक सहयोग वितरण गरिएको छ ।
उत्पीडनमा परेको दलित समुदायलाई माथी उकास्नको लागि दलित बिद्यार्थीहरूको शिक्षामा प्रोत्साहन स्वरुप आर्थिक सहयोग गरेको गाउँपालिकाका अध्यक्ष दिनेश लामाले बताउनुभयो ।
निर्वाचित भएर आएपछि पहिलो बर्ष दलित उत्थान कार्यक्रमका लागि १२ लाख र दोस्रो बर्ष अर्थात आर्थिक बर्ष २०८०÷०८१ मा १३ लाख बजेट व्यवस्था गरेको अध्यक्ष लामाले भन्नुभयो । दलित समुदाय उत्थान कार्यक्रमका लागि पालिका स्तरीय महिला सदस्य सुनिता लामगादेको संयोजकत्वमा समिति गठन समेत गरिएको छ ।
