काभ्रे,रेडियो रोशी,
नमोबुद्ध नगरपालिकामा बजार अनुगमन गरीएको छ । आज नगर उपप्रमुख रत्न बहादुर लामाको संयोजकत्वमा पालिका भित्रका २४ वटा होटल पसलहरुको अनुगमन गरीएको हो ।
अनुगमनको क्रममा मुलरुपमा व्यवसाय नविकरण समयमै नगरेको, इजाजत नलिई मदिरा विक्री वितरण गरेको, पसलमा म्याद गुज्रेका सामानहरु विक्री वितरण गरेको, मूल्यसूची नराखेको, होटल रेस्टुरेन्टहरुमा सरसफाई न्यून भेटिएको छ । त्यस्तै केहि होटलमा सडेगलेको खानेकुरा भेटिएको छ ।
अनुगमन टोलीले उक्त सडेगलेको खानेकुरा जफत गरी नष्ट गरेको छ । त्यसैगरी म्याद गुज्रेका सामानहरु ( प्याकेटका खानेकुराहरु, पेय पदार्थहरु) जफत गरीएको छ ।
अनुगमनको क्रममा व्यवसाय नविकरण समयमै गर्न, इजाजत लिएर मात्र मदिरा विक्री वितरण गर्न, सामानको मूल्यसूची राख्न तथा होटल सफा सुग्घर राख्न भनिएको छ ।
बजार अनुगमनमा प्रमुख प्रशासकीय अधिकृत कृष्ण गिरी, वडा नं. ७ का वडा अध्यक्ष धर्म सिं लामा, वडा नं २ का वडा अध्यक्ष कविराज श्रेष्ठ, नगर युवा परिषद्का कार्यकारी उपाध्यक्ष रामेश्वर अधिकारी, राजस्व शाखा प्रमुख रामचन्द्र पौडेल, कृषि शाखा प्रमुख हरिस भट्ट, भकुण्डे प्रहरी चौकी प्रमुख , नगर प्रहरी तथा रेडियो रोशीका पत्रकार देबराज उप्रेतीको सहभागिता रहेको थियो ।
