काभ्रे,रेडियो रोशी,
काभ्रे जिल्लाको रोशी गाउँपालिकाले स्थानीय युवाहरूलाई सरकारी सेवामा आकर्षित गर्ने उद्देश्यका साथ निःशुल्क लोकसेवा तयारी कक्षा सञ्चालन गर्ने भएको छ। गाउँपालिकाले आज एक सूचना जारी गर्दै प्रदेश लोकसेवा आयोग, बागमती प्रदेशको सहायक स्तर तहको पाठ्यक्रममा आधारित रहेर निःशुल्क विशेष कक्षा सञ्चालन गर्न लागेको जानकारी दिएको हो। गाउँपालिकाको आर्थिक वर्ष २०८२÷८३ को स्वीकृत कार्यक्रम अन्तर्गत यो तयारी कक्षा सञ्चालन गर्न लागिएको हो ।
कक्षामा सहभागी हुनका लागि रोशी गाउँपालिकाको स्थायी बासिन्दा हुनुपर्ने, मान्यता प्राप्त शिक्षण संस्थाबाट प्लस टु वा सो सरह उत्तीर्ण गरेको हुनुपर्ने र १८ वर्ष पुरा भई ३५ वर्ष ननाघेको (महिलाको हकमा ४० वर्ष ननाघेको) हुनुपर्ने योग्यताहरू तोकिएको छ ।
इच्छुक र योग्य स्थानीयहरुले सूचना प्रकाशन भएको मितिले १५ दिनभित्र गाउँपालिकाको कार्यालयमा शैक्षिक योग्यताको प्रमाणपत्रको प्रतिलिपि, २ प्रति पासपोर्ट साइजको फोटो, नागरिकता प्रमाणपत्रको प्रतिलिपि, वैयक्तिक विवरणको साथमा कक्षामा समावेश हुनका लागि दिइने निवेदन पेश गर्नुपर्ने निमित्त प्रमुख प्रशासकीय अधिकृत ठाकुर प्रसाद दाहालद्वारा हस्ताक्षरित सूचनामा उल्लेख गरिएको छ ।
