काभ्रे,
बैतडीको पुर्चौडी नगरपालिका जन्ती बोकेको बस दुर्घटना हुँदा १३ जनाको ज्यान गएको छ । ३६ जना घाइते भएका छन् । हिजो बेलुकी बैतडीको पुर्चौडी नगरपालिका–७ भवनेबाट बेहुली लिएर बझाङको सुनकुडातर्फ जाँदै गरेको पवनदूत यतायातको सुप प्र ०२ ००१ ख १११९ नम्बरको बस पुर्चौडीको बडगाउँ मोडमा पल्टिएको हो । उकालो सडकमा अत्यधिक भारका कारण बस दुर्घटनामा परेको हुनसक्ने प्रहरीको अनुमान छ । घाइतेहरुको स्थानीय अस्पताल, जिल्ला अस्पताल र डडेलधुरामा उपचार भैरहेको छ ।
विवाह सम्पन्न गरी बेहुली भित्र्याउन हिँडेको सो टोलीमा बेहुला र बेहुली भने छुट्टै गाडीमा सवार रहेकाले उनीहरू सकुशल रहेका छन् । १३ जनाको ज्यान जानेगरी भएको बस दुर्घटनामा दुःख व्यक्त गर्दै पुर्चौडी नगरपालिकाले एक सूचना जारी गरेर आज शोक बिदा दिएको छ । जारी सूचनामा नगरपालिका भित्रका सबै सरकारी कार्यालय, विद्यालय तथा निजी संस्थाहरू एक दिन बन्द गर्ने उल्लेख छ ।
