काभ्रे,
काभ्रे प्रतिनिधि सभा निर्वाचन क्षेत्र नम्बर २ का उम्मेदवार शिव प्रसाद हुमागाई मंसिर ४ को निर्वाचनमा पराजयपछि पनि मतदातालाई धन्यवाद दिन आफ्नो निर्वाचन क्षेत्रको यात्रामा रहनुभएको छ । लोकतान्त्रिक बाम गठबन्धनका साझा उम्मेदवार हुमागाईले काभ्रे १ को प्रदेश सभा १ बाट धन्यवाद कार्यक्रम प्रारम्भ गर्नुभएको हो ।कार्यक्रममा लोकतान्त्रिक बाम गठबन्धनबाट प्रदेश सभामा विजयी हुनुभएका नेकपा (एकीकृत समाजवादी) का नेता लक्ष्मण लम्साल पनि साथमै रहनुभएको छ । पराजितपछि पनि नेता धन्यवाद दिन गाउँ गाउमाँ पुग्दा केही आश्चार्यमा देखिएका छन भने कोही निराश थिए । हुमागाईलाई जिताउन नसकेकोमा हिनताबोध उनीहरुको अनुहारमा प्रष्ट देखिएको थियो । मतदातालाई धन्यवाद दिने क्रममा वडा नम्बर १२ पुगेपछि एकाएक सन्नाटा छाएको थियो ।
शुभकामना दिन बसेको टोलीका प्रमुख एवं नेपाली कांग्रेस १२ नम्बर वडा समितिका सभापति ज्ञानेन्द्र पराजुली हुमागाईलाई देख्न साथ रुन थाल्नुभएको थियो । वरिपरि बसेका सबै मतदाताको अनुहारमा खुशीयाली पटक्कै थिएन । उनीहरुको गहभरी आँशु देखिन्थ्यो । ठूलडिहीका मतदाताले कांग्रेसभित्रको अन्तरघातले आफुहरु हारमा परेको भन्दै गठबन्धनका अन्य दलको समेत सहयोग भरपर्दो नभएको बताउदै आको्रसित समेत बनेका थिए । निर्वाचनमा आफु पराजित भएपनि हुमागाईले निर्वाचनका बेला बोलेको प्रतिबद्धता पुरा गर्न पछि नपर्ने बताउनुभयो ।
