काभ्रे,
नेपालमा आँखाको समस्या भएकाहरुमा मोतीबिन्दुको समस्या धेरैलाई हुने गरेको पाइएको छ । पछिल्लो समय बिग्रँदै गएको खानपान र जीवनशैलीका कारण यो समस्या बढीरहेको छ । विभिन्न अस्पतालमा आँखाको उपचारका लागि पुग्नेमध्ये ६५ प्रतिशतभन्दा बढीमा मोतीबिन्दुको समस्या पाइएको डाक्टरहरूले बताएका छन् । उमेर बढ्दै जानु, मधुमेह अर्थात् चिनीरोग, हाइपरटेन्सनजस्ता समस्या, पोषण तत्वको कमी र वंशाणुगत कारणले पनि मोतीबिन्दु हुने गरेको आँखा विशेषज्ञ डाक्टर सुमन थापाले बताउनुभयो ।
यसैगरि १३ प्रतिशत मानिस आँखाको पर्दाजन्य रोग र ६ प्रतिशत मानिस आँखाको नानीमा हुने अन्धोपनाबाट प्रभावित छन् । पाँच प्रतिशतमा जलविन्दु, चार प्रतिशतमा दृष्टिदोष र अन्य ७ प्रतिशत विभिन्न कारणले दृष्टिविहीन भएको विभिन्न अध्ययनले देखाएका छन् ।
