काभ्रे,
काभ्रे जिल्लाको बेथानचोक गाउँपालिकाले निःशुल्क लोकसेवा तयारी कक्षा सञ्चालन गर्ने भएको छ । शिक्षित युवा जनशक्ति विदेश पलायन हुनुभन्दा पनि सरकारी सेवामा आकर्षित भएर स्वदेशमै सेवा गर्न प्रेरित हुन् भन्ने उद्देश्यका साथ यो कार्यक्रमको अवधारणा अगाडि सारिएको हो । पालिकाले उच्च शिक्षा अध्ययन गर्दै गरेका वा अध्ययन सकेर खाली बसेका विद्यार्थीहरूका लागि काठमाडौंको शंखमूलस्थित चैतन्य एकेडेमीसँगको सहकार्यमा जुममार्फत लोकसेवा तयारी कक्षा सञ्चालन गर्न लागेको हो।
कार्यक्रममा बोल्दै अध्यक्ष भगवान अधिकारीले विकास निर्माणका साथै युवा केन्द्रित कार्यक्रममा पनि आफू गम्भीर रहेको बताउनुभयो । उँहाले बाटोघाटोको समस्या समाधानका लागि प्रत्येक वर्ष पाँच किलोमिटर सडक आफ्नै लागतमा कालोपत्रे गर्ने लक्ष्य गाउँपालिकाले लिएको उनले जानकारी दिनुभयो । यस्तै प्रमुख प्रशासकीय अधिकृत राजेन्द्र भण्डारीले विद्यार्थीहरूलाई लोकसेवा आयोगका कक्षा लिन आफूहरूले सक्दो सहयोग गर्ने बताउाुभएको छ । गत वर्षदेखि नै यो अभियान थालिएको जानकारी दिँदै युवाहरूका लागि प्रभावकारी देखिएकाले आगामी वर्षमा पनि यस कार्यक्रमले निरन्तरता पाउने उनले जानकारी दिनुभयो ।
