काभ्रे,
बेथानचोक कप पुरुष भलिबल प्रतियोगिताको उपाधि खानीखोला गाउँपालिकाले जितेको छ । बेथानचोक खेलकुद विकास समितिको आयोजनामा भएको चौथो बेथानचोक कप जिल्ला स्तरीय आमन्त्रण पुरुष भलिबल प्रतियोगिताको उपाधि खानीखोला गाउँपालिका भलिबल क्लबले जितेको हो । खानीखोलाले महाङ्काल खेलकुद विकास समितिको भलिबल क्लबलाई पराजित गर्दै उपाधि हात पारेको हो । आज बेथानचोक गाउँपालिकाको वडा नम्बर–२ ढुंखर्कमा भएको फाइनल खेलमा खानीखोलाले महाङ्काललाई २५–१९, २५–२०, २५–२२ को सोझो सेटमा पाखा लगाएको थियो । जीतसँगै खानीखोलाले ६० हजार रुपैयाँ नगदसहित ट्रफी, मेडल र प्रमाणपत्र प्राप्त गरेको छ भने ललितपुरको महाङ्काल क्लबले द्वितीय स्थान हाँसिल गर्दै ४० हजार रुपेयाँ नगदसहित ट्रफी, मेडल र प्रमाण पत्र प्राप्त गरेको छ ।
त्यस्तै प्रतियोगितामा काभ्रेको महाभारत गाउँपालिका टिम र पनौती नगरपालिका टिम तृतिय भएका छन् । तृतिय स्थान प्राप्त गर्ने दुवैै टिमले १५÷१५ हजार रुपैयाँ नगद सहित ट्रफी, मेडल र प्रमाण पत्र प्राप्त गरेका छन् । प्रतियोगितामा उत्कृष्ट डिफेण्डर महांकाल क्लबका सुदिप सिंतान, उत्कृष्ट ब्लकर खानीखोलाका मनराज आलेमगर, उत्कृष्ट सेटर खानीखोलाका सुवास थोकर, उत्कृष्ट स्पाइकर महांकालका सुनिल विक र प्रतियोगिताका उत्कृष्ट खेलाडी खानीखोलाका सुमन थोकर घोषित भएका छन् । उनीहरुलाई ट्रफिसहित पुरस्कृत गरिएको थियो । प्रतियोगितामा १० टिमले प्रतिस्पर्धा गरेका थिए ।
