काभ्रे,
काभ्रेपलाञ्चोक जिल्लाको नमोबुद्ध नगरपालिका स्थित मेथिन्कोट अस्पतालमा मानसिक स्वास्थ्य सेवाको शुभारम्भ भएको छ । मानसिक अस्पताल लगनखेलको सहयोगमा आज बाग्मती प्रदेश सरकारका स्वास्थ्य मन्त्री निमा लामाले उक्त सेवाको शुभारम्भ गर्नुभएको हो । सेवाको शुभारम्भ गर्दै मन्त्री लामाले प्रदेश सरकारले नागरिकहरुको हरेक समस्यामा केन्द्रित रहेर काम गरिरहेको बताउनुभयो । मेथिन्कोट अस्पताललाई राजमार्गका ट्रमा केयर युनिटका रुपमा विकास गर्ने तथा शैया थप गरी स्वास्थ्यका सबै सेवा उपलब्ध हुने स्वास्थ्य संस्थाका रुपमा विकास गर्ने योजनामा बजेट विनियोजन गर्ने मन्त्री लामाले बताउनुभयो । त्यसैगरि नगर प्रमुख कुन्साङ लामाले नगरपालिकाले अस्पताल संचालनका लागि आवश्यक सहयोग गर्ने बताउनुभएको छ ।
मेथिन्कोट अस्पतालका सुपरिटेन्डेन्ट डा. पुरुषोतम सेढाईले जिल्लामा प्रति ३ दिन एक जना ब्यक्तिले मानसिक रोगकै कारण आत्महत्या गरिरहेको बताउनुभयो । एक जना व्यक्तिले आत्महत्या ग¥यो भने १ सय ३५ जनालाई असर पर्ने डा. सेढाईले बताउनुभयो । यो सेवा हरेक महिनाको अन्तिम बिहिबार उपलब्ध हुने अस्पतालले जनाएको छ ।
