रोशी सहकर्मी–बैशाख २३,
२०७७,काभ्रे/

पनौती नगरपालिका वडा न ७ ले नेवारी जाती बाहेक अन्य जातीलाई घर जग्गा बेच बिखन गर्न नपाउने निर्णय गरेको छ । नेवारी समुदाय बाहेक अन्य जातीलाई घर बिक्री गरेमा वडा कार्यालयबाट दिइने घरबाटो सिफारिस नै नदिने निर्णय गरेको छ ।

आज बसेको बैठकले उक्त निर्णय गरेको वडा कार्यालयले जनाएको छ । वडा अध्यक्ष रामचन्द्र नास्नानीद्धारा हस्ताक्षरित सूचनामा “पनौती नगरपालिका ७ नम्बर वडाको पुरानो बजार स्मारक क्षेत्र भित्र नेवारी समुदायको बाहुल्यता भएकोले धर्म संस्कृति र पुरातात्विक सम्पदा जोगाउनका लागि पुरानो घर तथा जग्गा धनीहरुले नेवार जाति बाहेक अन्य जातीलाई बेच बिखन गर्नका लागि घरबाटो मूल्यांकन सिफारिस लिन आएको खण्डमा नदिन भद्रभलादमीहरुले यस कार्यालयमा पटक पटक गुनासो गरेको हुँदा उक्त निर्णय गरिएको” जनाइएको छ ।

वडा कार्यालयले बेचबिखनको सिफारिस लिन आएमा घर धनीहरुलाई वडा कार्यालयबाट सेवा प्रवाह नदिने निर्णय भएको जनाइएको छ ।

Facebook Comments