काभ्रे,
इजरायलमा विद्रोही समूह हमासले गरेको आक्रमणमा परी मृत्यु भएका नेपालीको शव नेपाल ल्याउन त्यहाँको दूतावासले पहल थालेको छ । इजरायलका लागि नेपाली राजदूत कान्ता रिजालले त्यहाँको सरकार मातहतका निकायसँग समन्वय भइरहेको जानकारी दिनुभयो । उहाँका अनुसार समस्यामा परेका नेपालीको उद्धारका लागि पनि विवरण सङ्कलनको काम भइरहेको छ । नेपाल फर्कन चाहानेले अनलाइन फारम भर्न सक्नेछन् । हमासको आक्रमणमा परी १० नेपाली विद्यार्थीको मृत्यु भए पनि विस्तृत विवरण दूतावासले सार्वजनिक गरेको छैन । गएको शनिवार प्यालेस्टाइन लडाकु समूह हमासको आक्रमणमा १० जना नेपालीहरूको मृत्यु भएको थियो ।
यसैबीच इजरायलमा भएको द्वन्द्वमा परि हालसम्म १ हजार १ सयभन्दा बढीको मृत्यु भएको बिबिसीले जनाएको छ । इजरायली सेनाकाअनुसार हमास लडाकुहरूले गरेको हमलामा इजरायलपट्टि ७ सयभन्दा बढी मानिसहरू मारिएका छन् भने प्यालेस्टाइन पक्षको पछिल्लो अपडेटले गाजामा इजरायलले गरेको जवाफी हमलामा ४ सय १३ जनाको मृत्यु भएको छ ।
