काभ्रे,
काभ्रेपलाञ्चोक जिल्लाको मेथिनकोट अस्पतालमा आपतकालीन अवस्थाको व्यवस्थापनका लागि पूर्वअभ्यास (ड्रिल) गरिएको छ । हिजो मेथिनकोट अस्पतालको आयोजनामा तथा धुलिखेल अस्पतालको प्राविधिक सहयोगमा भएको अभ्यासमा नेपाली सेनाको २६ नं बाहिनीका सैनिक कर्मचारी, प्रहरी चौकी भकुण्डेवेशीका प्रहरीका साथै धुलिखेल अस्पताल र मेथिनकोट अस्पतालका स्वास्थ्यकर्मीले नाटकीय रुपमा दुर्घटना भएको देखाउदै त्यसको व्यवस्थापन गरेका थिए ।
कार्यक्रमलाई सम्बोधन गर्दै जिल्ला समन्वय समिति काभ्रेका प्रमुख दीपककुमार गौतमले एउटा औषधी वा सुईले मानिसको जीवन रक्षा गर्न सक्ने भन्दै आपतकालीन अवस्थामा गर्नुपर्ने व्यवस्थापनको अभ्यासले धेरै कौशल र सीप प्राप्त हुने बताएउनुभयो । नमोबुद्ध नगर प्रमुख कुनसाङ लामाले सबैको उद्धेश्य मानवीय क्षति कम गर्ने भएको भन्दै ‘भगवानरुपी’ स्वास्थ्यकर्मीले अरुको जीवनरक्षाको लागि काम गर्नुपर्ने बताउनुभयो ।
त्यसैगरी नेपाली सेनाको २६ नं बाहिनीपति सहायक रथी सुनिल घलेले अभ्यासका लागि घटना तयार गर्दै समूह कार्य गन पाएको भए अझ यथार्थपरक हुने बताउनुभयो ।
रोशी गाउँपालिका उपाध्यक्ष मिमबहादुर वाइवाले अस्पतालले रोशी गाउँपालिकाका नागरिकलाई पनि सेवा दिइरहेको भन्दै पालिकाको तर्फबाट पनि सहयोग गर्ने बताउनुभयो ।
पाँचखाल नगर उपप्रमुख सुर्यमाया दनुवारले मानवीय क्षति कम गर्न यस्ता अभ्यासहरु हुनुपर्ने बताउनुभयो ।
धुलिखेल अस्पतालको आकस्मिक सेवा विभाग प्रमुख डा. सानुकृष्ण श्रेष्ठले मेथिनकोट अस्पतालले विश्व स्वास्थ्य संगठन र नेपाल सरकारले तोकेको मापदण्ड अनुसारको स्तरीय आपतकालीन व्यवस्थापन योजना बनाएको भन्दै प्रशंसा गर्नुभयो ।
मेथिनकोट अस्पताल सञ्चालन तथा व्यवस्थापन समितिका अध्यक्ष कृष्णप्रसाद खनालले अस्पतालले आर्थिक संकट बेहोरिरहेको भन्दै भवन निर्माणको लागि जग्गा व्यवस्थापन गर्न नसक्दा साँघुरा संरचनामा सेवा दिनुपरिरहेको बताउनुभयो ।
निमित्त मेडिकल सुपरिटेन्डेन्ट डा. मधुकर दाहालले श्रोत र साधनको अभावमा सेवा विस्तार गर्न नसकिएको भन्दै गुनासो व्यक्त गर्नुभयो । उँहाले मृगौला डाइलासिस, शल्यक्रिया लगायतका सेवा सुरु गरेको भन्दै दुई साताभित्र सिटीस्क्यान सेवा पनि सुचारु गर्ने बताउनुभयो ।
मेडिकल अधिकृत डा. हिमाल खनालले अस्पतालले विपद प्रतिकार्य योजना बनाइसकेको जानकारी दिँदै राजमार्गमा हुने सवारी दुर्घटनाका दुर्घटना बढी हुने बताउनुभयो ।–नौलो समाचार
