काभ्रे,
हिउँदे वर्षा गराउने प्रणाली भित्रिएसँगै आज मुलुकका अधिकांश स्थानमा पानी पर्ने भएको छ । गएरातिदेखि नै विभिन्न स्थानमा बदली सुरु भएको र आजदेखि दुई दिन देशका अधिकांश क्षेत्रमा वर्षा हुने मौसम पूर्वानुमान महाशाखाले जनाएको छ । महाशाखाले विशेष सूचना बुलेटिन जारी गर्दै यो प्रणालीले गत बिहीबारको भन्दा बढी वर्षा र हिमपात गराउने जनाएको छ । गत बुधबार भित्रिएको प्रणालीले कर्णाली र सुदूरपश्चिमका अधिकांश स्थानमा वर्षा र हिउँ परेको थियो ।
महाशाखाका मौसमविद् रोजन लामिछानेका अनुसार सुदूरपश्चिम, कर्णाली, लुम्बिनी, गण्डकी, बागमती, कोशी प्रदेशका विभिन्न भूभागमा हल्कादेखि मध्यम वर्षाको सम्भावना छ । उच्च पहाडी तथा हिमाली भेगमा हल्कादेखि मध्यम हिमपात हुने अनुमान गरिएको छ । आज र भोलि हुने वर्षाका कारण न्यूनतमसँगै अधिकतम तापक्रममा गिरावट आउने अनि चिसो बढ्ने मौसमविद् लामिछानेले बताउनुभयो । वर्षा र हिमपातका कारण हुने तापक्रमको गिरावटले स्वास्थ्य समस्या सिर्जना गर्न सक्ने भएकाले सतर्क रहन महाशाखाले अनुरोध गरेको छ ।
