काभ्रे,
दुधको भुक्तानी माग गर्दै काभ्रे जिल्लाका दुग्ध उत्पादक किसानले निःशुल्क दुध वितरण गर्दै शान्तिपूर्ण विरोधमा उत्रिएका छन् । आज बनेपा चारदोबाटोमा आधा घण्टा चक्काजाम गर्दै किसानले सडक किनारामै दुध उमालेर गिलासमा राखी बाँडेका हुन्। किसानहरुले समयमानै दुधको भुक्तानी पाउनुपर्ने, उत्पादन लागत घटाउनुपर्ने माग राख्दै शान्तिपूर्ण चक्काजाम तथा निशुल्क दुध वितरण कार्यक्रम गरेका हुन् ।
समयमै दुधको भुक्तानी नपाएको तथा गुणस्तरीय दूध बिक्रिमा पनि समस्या भएको भन्दै काभ्रे जिल्ला दुग्ध उत्पादक सहकारी संघ लिमिटेड र विभिन्न राजनीतिक दलको संयुक्त आयोजनामा आधा घण्टा अरनिको राजमार्ग चक्का जाम गरेका हुन् ।
आन्दोलनमा उत्रिएका किसानहरुले ‘उत्पादन लागत घटाउने कार्यक्रमहरु तुरुन्त लागु गर’, ‘दुधको भुक्तानी तुरुन्त गर’ , ‘पशुखोपको ब्यवस्था तुरुन्त गर’ लगायतका नारा लेखिएका पोष्टर बोकेर प्रदर्शन गरेका थिए । किसानहरुले कृषि तथा पशुपक्षी विकासमन्त्री डा.वेदुराम भुसालको राजिनामा समेत मागेका छन् ।
