काभ्रे,
कर्णाली प्रदेश सरकारले ल्याएको ‘बैँक खाता छोरीको, सुरक्षा जीवनभरीको’ कार्यक्रम अलपत्र परेको छ । छोरीमाथि हुने विभेदको अन्त्य, बालविवाह न्यूनीकरण र उच्च शिक्षाको ग्यारेन्टी गर्ने महत्वकाँक्षी योजनासहित ल्याइएको कार्यक्रमले निरन्तरता पाउन सकेको छैन् । २० वर्षसम्म मासिक ५ सयका दरले एक परिवारका दुई जना छोरीको बैँक खातामा रकम जम्मा गरिदिने र २० वर्ष नपुग्दै हुने विवाहलाई रोक्ने कार्यक्रमको योजना थियो ।
२०७६ साउन यता जन्मिएका छोरीहरूका लागि प्रदेश सरकारले स्थानीय तहमार्फत बैँक खातामा सुरुमा एक हजार र त्यसपछि मासिक पाँच सयका दरले २० वर्षसम्म रकम जम्मा गर्ने नीतिमा उल्लेख थियो । तर दुई वर्ष यता यो कार्यक्रम नै अलपत्र परेको छ ।
२०७६ साउन यता जन्मिएका कर्णालीका ४१ हजार ५ सय ७२ छोरीहरुको खातामा सुरुको तीन वर्ष प्रदेश सरकारले रकम जम्मा गरि दिएको थियो । पछिल्लो दुई वर्ष यता भने खातामा रकम नै आएको छैन भने कतिपयलाई कार्यक्रमबारे जानकारीसमेत छैन ।
