काभ्रे,
नेपाली कांग्रेसका सभापति शेर बहादुर देउवा आज काभ्रे आउँनुहुने भएको छ । धुलिखेल नगरपालिका वडा नं ६, जरणडाँडा स्थित हस्पिटल चोकमा स्थापना गरिएको महामानव वी.पी. कोइरालाको प्रतिमा अनावरण गर्न पार्टी सभापति देउवा काभ्रेको धुलिखेल आउन लागेका हुन् । उहाँको स्वागतको लागि धुलिखेलका सडकका दायाँ बायाँ र विभिन्न स्थानमा ‘चारतारे झण्डा’ राखिएको हो ।
पूर्व प्रधानमन्त्री समेत रहनुभएको सभापति देउवाको स्वागतमा धुलिखेलका विभिन्न ४ स्थानमा स्वागतद्वार समेत राखिएको छ । कार्यक्रमको सम्पूर्ण तयारी पुरा भएको महामानव वी.पी. कोइराला प्रतिमा निर्माण समितिका संयोजक समेत रहनुभएको नेपाली कांग्रेस काभ्रे जिल्ला कार्यसमिति सदस्य एवं धुलिखेल नगरका पूर्व सभापति जितकृष्ण श्रेष्ठले जानकारी दिनुभयो । सभापति देउवाले प्रतिमा अनावरण गरेपछि र्यालीसहित धुलिखेल नगरपालिका सभाहलमा पुगेर औपचारिक समारोहलाई सम्बोधन गर्नुहुने कार्यक्रम रहेको छ ।
२०७१ सालमा नेपाली कांग्रेसका तत्कालिन महामन्त्री कृष्णप्रसाद सिटौलाले शिलान्यास गर्नुभएको प्रतिमाको ९ बर्षपछि असोज ५ गते आज अनावरण गर्न लागिएको हो । ढलौटबाट बनेको प्रतिमाको लागत १५ लाख रुपैयाँ छ ।
बिपीको परिकल्पनामा ०५२ सालमा बिपी राजमार्ग निर्माण सुरु भएको थियो । २०१५ सालमै बिपीले राष्ट्रिय राजमार्गको परिकल्पना गरेर धुलिखेलबाट पूर्व जोड्ने सडक बनेको थियो। उक्त राजमार्गले धुलिखेलपूर्वको जनजीवन परिवर्तनमा महत्त्वपूर्ण भूमिका खेलेको हुनाले सम्मानस्वरूप उहाँको प्रतिमा स्थापना गरीएको थियो ।
कार्यक्रममा जिल्लाको १३५ वटै वडाबाट १० हजारको हाराहारीमा नेपाली कांग्रेसका नेता, कार्यकर्ता, शुभेच्छुक तथा शुभचिन्तक सहभागि हुने बताइएको छ ।
