काभ्रे,
किम्बु खाँदा भएको अत्याधिक वान्ताका कारण मेथिन्कोटमा १२ बर्षीय बालकको मृत्यु भएको छ । नमोबुद्ध ४ काफ्लेथोक निवासी १२ बर्षीय बालक प्रशान्त मैनालीको किम्बु खाँदा भएको अत्याधिक वान्ताका कारण ज्यान गएको हो । मैनालीको मेथिन्कोट अस्पतालमा उपचारका क्रममा हिजो (बुधबार) निधन भएको प्रहरीले जानकारी दिएको छ । प्रशान्तले मंगलबार जनक माध्यमिक विद्यालयबाट घर फर्कने क्रममा बाटोमा रहेको किम्बु खाएका थिए । किम्बु खाए पश्चात प्रशान्तलाई राति अत्याधिक वान्ता भएको थियो । लगातार वान्ता भएपछि उनलाई तत्कालै घर नजिकै रहेको मेथिन्कोट अस्पतालमा उपचारका लागि पुर्याएका थिए ।
अस्पतालमा उपचार गरे पछि बालक प्रशान्तले वान्ता गर्न केहि कम गरेका थिए । विहान ४ बजेबाट उनले पुनः वान्ता गरे पछि अस्पतालले थप उपचार गरेको थियो । चिकित्सकका अनुसार वान्ताका कारण उनको फोक्सोमा देखिएको समस्या समाधान गर्न नपाउँदै ज्यान गएको हो । प्रहरी चौकी भकुण्डेले घटनाका बारेमा जानकारी गराउँदै बालकको शव परिक्षणका लागि धुलिखेल पठाएको थियो । हिजो नै बालकको शव परिक्षण सकेर आफन्तले बुझि लगेका छन् ।
चिकित्सकहरुले बायुमा आएको प्रदुषित वातावरण र फलफुलहरु नपखाली सिधै खाँदा त्यसमा हुने विषादी सहितका किराका कारण फुड पोईजन हुने र हरेक ब्यक्तिलाई वान्ता हुँदा ज्यान समेत जाने भएकाले त्यस्ता बस्तुहरु सिधै नखान अनुरोध गरेको छ । अहिले ग्रामिण भेगमा किम्बु खाने समय भएकाले सचेत रहन चिकित्सकहरुले अनुरोध गरेका छन् ।
