काभ्रे,
आज वैशाख १२ गते कसैको जन्मदिन होला, कसैका लागि खुशीको दिन होला । तर समग्रमा हेर्दा वैशाख १२ गते मुलुकका लागि कालो दिन हो । २०७२ साल बैशाख १२ गते आजकै दिन ८ हजार भन्दा बढि नेपालीको ज्यान गएको थियो भने २२ हजार ३ सय ११ जना घाइते भएका थिए ।
गोरखाको बारपाक केन्द्रविन्दु बनाएर वैशाख १२ गते ११ बजेर ५६ मिनेटमा आएको त्यो शक्तिशाली भूकम्पले पुर्याएको त्यो क्षतिको दिनलाई आम नेपालीले उज्यालो दिनको रूपमा मनाउन सक्दैनन् । नौं वर्ष अगाडि ०७२ वैशाख १२ गते शनिबार बारपाक केन्द्रबिन्दु बनाएर गएको ७.६ रेक्टर स्केलको भूकम्प र त्यसपछि निरन्तर गएको ठूला पराकम्पमा धेरै नेपालीहरुले ज्यान गुमाएका थिए ।
बारपाकका सहित आठ हजार ९७० जनाले ज्यान गुमाएका थिए भने २२ हजार भन्दा बढी मानिस घाइते भएको गृह मन्त्रालयको तथ्याङ्क छ । भूकम्पबाट पाँच लाख ११ हजार ३९० घर पूर्ण रूपमा क्षति भएको थियो भने दुई लाख ८६ हजार ७६७ घरमा आंशिक क्षति पु¥यायो ।
बितेका वर्षमा सरकारले अधिकांश व्यक्तिगत घरहरुको पुनर्निर्माण गरेको छ भने धरहरा, बसन्तपुर दरबार, काष्ठमन्डप लगायतका सम्पदाको पनि पुुननिर्माण गरिएको छ । केही अझै पुननिर्माणको क्रममा छन् ।
सरकारले १९ वटा जिल्लामा एकीकृत नमुना बस्ती निर्माण पनि गरेको छ । महा भूकम्पपछिको पुनर्निर्माणमा पौने चार खर्ब सकिएको छ । तर, नौ वर्षमा अझै ९२ हजार विस्थापित परिवारका घर पुनर्निर्माण हुन बाँकी छन् भने सिंहदरबार र धरहराजस्ता ऐतिहासिक संरचना निर्माण कार्य अझै बाँकी छन् ।
बारपाक सुलीकोट गाउँपालिकामा आज सार्वजानिक बिदा
गोरखाको बारपाक सुलीकोट गाउँपालिकाले आज सार्वजनिक बिदा दिएको छ । २०७२ साल बैशाख १२ गते बारपाक केन्द्रबिन्दु बनाई गएको भूकम्पमा परि दिवङ्गत हुुनुभएका नागरिकहरूको सम्मान र सम्झनामा बिदा दिइएको गाउँपालिकाले जनाएको छ ।
हिजो बसेको कार्यपालिका बैठकले बारपाक सुलीकोट गाउँपालिका भित्रका सरकारी कार्यालय, गैरसरकारी कार्यालय विद्यालय, बैङ्क तथा वित्तिय संस्थाहरूमा बिदा दिने निर्णय गरेको गाउँपालिकाका अध्यक्ष विष्णुप्रसाद भट्टले जानकारी दिनुभयो । साथै बारपाक सुलीकोट गाउँपालिकाको वडा नं १ मा रहेको हिमालय माध्यमिक विद्यालयको खेल मैदानमा गाउँपालिकाको तर्फबाट आज दिउँसो ११ः४५ बजे श्रद्धाञ्जली सभामा कार्यक्रमसमेत आयोजना गरिएको छ ।
