काभ्रे,रेडियो रोशी,
तेमाल गाउँपालिकाका नयाँ मेलमिलापकर्ताहरुलाई दिईएको ४८ घन्टे आधारभुत तालिम सम्पन्न भएको छ । नाङसाल स्टडी एण्ड डेभलपमेन्ट सेन्टर को आयोजना, तेमाल गाउँपालिकाको आर्थिक सहयोग एवम् प्राकृतिक स्रोत द्वन्द रूपान्तरण केन्द्र नेपालको सहजीकरणमा सञ्चालन भएको तालिमको आज तेमाल गाउँपालिका अध्यक्ष चन्द्रबहादुर तामाङकोे प्रमुख आतिथ्यता एवम् गाउँपालिका उपाध्यक्ष तथा न्यायिक समितिका अध्यक्ष दलमाल थोकर (डि.एम) को सभाध्यक्षतामा तालिम सम्पन्न भएको हो ।
यहि जेठ ६ गतेदेखि भकुण्डेबेसी स्थित कुटुम्ब रिसोर्टमा तेमाल गाउँपालिका भित्रका ३० जना नयाँ मेलमिलापकर्ताहरूका लागि आठ दिन (४८ घण्टा) अवधिको मेलमिलाप सम्बन्धी आधारभूत तालिम सञ्चालन गरीएको थियो ।
कार्यक्रममा आफ्नो शुभकामना मन्तव्य राख्नुहुँदै गाउँपालिका अध्यक्ष चन्द्र बहादुर तामाङले तालिममा सहभागीहरूले सिकेको सिप आउँदा दिनमा समाजमा प्रयोगमा ल्याउने कुरामा विश्वस्त रहेको बताउनुभयो । मेलमिलाप सम्बन्धी कार्यले समाज निर्माणमा सहयोग पुग्नुका साथै यो एक धार्मिक कार्य भयकाले पुण्यको पनि कमाइने उँहाको भनाई छ ।
कार्यक्रमका सभाध्यक्ष एवं तेमाल गाउँपालिका उपाध्यक्ष तथा न्यायिक समिति संयोजक दलमान थोकरले सहभागीहरूलाई आगामी दिनमा तेमाल गाउँपालिकाको न्यायिक समिति सम्म आउने विवादहरू स्थानीय स्तरमै समाधान हुने र धेरै टाढादेखि गाउँपालिकासम्म मेलमिलापको लागि धाउनुपर्ने बाध्यता अन्त्य हुने विश्वास व्यक्त गर्नुभयो ।
तालिम पश्चात् गाउँपालिकाको मेलमिलापकर्तामा सूचीकृत हुनको लागि हुने प्रक्रियाहरूको बारेमा पनि व्याख्या गर्नुभएको थियो । मेलमिलापकर्ताहरूले सकारात्मक सोचका साथ कुनै पनि खाले पक्षपात नगरी विवाद समाधान गर्ने कुरामा आफु विश्वस्त रहेको बताउनुभयो ।
तालिम समापन गर्दै गाउँपालिका अध्यक्ष चन्द्र बहादुर तामाङ, सभाध्यक्ष एवं गाउँपालिका उपाध्यक्ष तथा न्यायक समिति संयोजक दलमान थोकर, प्राकृतिक स्रोत द्वन्द रूपान्तरण केन्द्र नेपालका प्रमुख प्रशिक्षक रिता मानन्धर र डेभलपमेन्ट सेन्टरका व्यवस्थापक शिवराम काफ्लेले सहभागीहरूलाइ संयुक्त रुपमा प्रमाणपत्र वितरण गर्नुभएको थियो ।
समापन कार्यक्रममा गाउँपालिका प्रमुख प्रशासकीय अधिकृत पवन कुमार प्याकुरेल, लेखा प्रमुख सूर्यप्रसाद त्रिपाठी, स्वास्थ्य संयोजक शिवहरि पाठक, कृषि शाखा संयोजक कुलदिप पहाडी, शिक्षा शाखा प्रमुख कृष्णराम घिमिर,े शिक्षा शाखा सहायक भिमलाल लामा न्यायिक समिति सहजकर्ता मन्जिल दङ्गाल तथा प्राकृतिक स्रोत द्वन्द रूपान्तरण केन्द्र नेपाल बाट प्रमुख प्रशिक्षकको रूपमा प्रशिक्षण दिनुहुने रिता मानन्धर लगायतकोे उपस्थिति रहेको थियो ।
