काभ्रे,
गृह मन्त्रालयबाट प्राप्त निर्देशन अनुसार उपत्यका ट्राफिक प्रहरी कार्यालयले कारबाहीमा परेका सवारी चालकहरुलार्ई ट्राफिक स्वयंसेवकको रुपमा खटाउन सुरु गरेको छ । उपत्यका ट्राफिक प्रहरी कार्यालयले आजदेखि सचेतना कक्षा लिनुपर्ने किसिमका कारबाहीमा परेकाहरुलाई एक घण्टा ट्राफिक स्वयंसेवकको रुपमा खटाउन थालेको एसएसपी जीवन श्रेष्ठले जानकारी दिनुभयो । आजैमात्र कारबाहीमा परेका ६०४ जनाले उपत्यकाका विभिन्न चोकमा स्वयंसेवकका रुपमा ट्राफिक व्यवस्थापन गरेका छन् ।
उनीहरुले बिहान ९ बजेदेखि ५ बजेसम्म सिंहदरबार गेट, माइतीघर, भद्रकाली, पुतलीसडक, पद्मोदय मोड, सातदोबाटो चोक लगायतका स्थानहरुमा ट्राफिक स्वयंसेवकको रुपमा खटिने एसएसपी जीवन श्रेष्ठले जानकारी दिनुभयो । केही समय सचेतनासम्बन्धी कक्षा लिएपछि उनीहरुलाई फ्लोरिसेन्ट ज्याकेट लगाएर सडकमा पठाईएको हो । हरेक समूहको साथमा एक जना प्रशिक्षित ट्राफिक प्रहरी हुने एसएसपी श्रेष्ठले बताउनुभयो । उपत्यकामा १८ सय ट्राफिक प्रहरी सडक व्यवस्थापनमा खटिन्छन् । तीमध्ये कम्तीमा ३ सय महिला प्रहरी रहेको उपत्यका ट्राफिक प्रहरी कार्यालयको तथ्यांक छ ।
उपप्रधान एवं गृहमन्त्री रवि लामिछानेले हिजो फेसबुकमा स्ट्याटस लेखेर महिनावारीको समयमा चार दिन महिला ट्राफिक प्रहरीले काम गर्नुनपर्ने घोषणा गर्नुभएको थियो । त्यसको साटो मापसे लगायतका कारबाहीमा परेकालाई ट्राफिक स्वयंसेवकको रुपमा खटाइने उँहाले बताउनुभएको थियो ।
