काभ्रे,
काभ्रे जिल्लाको भुम्लु गाउँपालिका र चौरीदेउराली गाउँपालिकामा बजार अनुगमन गरीएको छ । सहायक प्रमुख जिल्ला अधिकारी सुवास पौडेलको अध्यक्षतामा रहेको जिल्ला बजार अनुगमन समितिले जिल्लाका दुई गाउँपालिकामा संयुक्त बजार अनुगमन गरेका हुन् ।
अनुगमनको क्रममा भुम्लु गाउँपालिकामा रहेको स्टेश्नरीबाटै औषधीहरु विक्री गरेको भेटिएको छ । गाउँपालिकाको केन्द्रमा रहेको आर आर स्टेश्नरीबाट औषधीहरु विक्री गरेको पाइएपछि स्टेश्नरी सञ्चालक राजकुमार लामालाई रु ५ हजार जरिवाना गराइएको छ ।
त्यस्तै भुम्लुको सल्लेबजारमा रहेका अधिकांश होटल तथा खाजा घरहरु दर्ता विना नै सञ्चालनमा रहेको भेटिएको छ ।
किराना पसलमा लेवल विनाका बेकरीका सामानहरु, पसलमा मूल्य सूची नराखिएको , पेट्रोलियम पदार्थ र खाद्य सामाग्री एकै ठाउँमा राखेर विक्री गरेको पाइएको छ ।
त्यसैगरी चौरीदेउराली गाउँपालिकाको केही होटल तथा पसलहरु दर्ता विना नै सञ्चालनमा रहेको भेटिएको छ । पसलहरु दर्ता भएपनि नियमित नविकरण नभएको र कर नतिरेको भेटिएको थियो ।
यहाँका बिभिन्न एग्रोभेट, प्रेम एग्रोभेटहरु औषधी व्यवस्था विभाको अनुमति विना नै भेटेनरी तथा कृषि सम्बन्धी औषधी, विषादी, विउविजन विक्री गरेको पाइएको थियो । बजार अनुगमन गरी कैफियत भेटिएकालाई कार्वाही गरिएको छ ।
