काभ्रे,
रोशी गाउँपालिका वडा नंम्वर १० वाल्टिङ्गका ‘एक घर,एक धारा’ कार्यक्रम अन्तर्गत ६० घरधुरीमा स्वच्छ खानेपानी पुगेको छ । हिजो (सोमबार) रोशी गाउँपालिकाका अध्यक्ष दिनेश लामाले सफा तथा स्वच्छ समुदाय घोषणा र खानेपानी तथा सरसफाई आयोजनाको उद्घाटन गरेका गर्नुभएको हो ।
“दिगो र गुणस्तरयुक्त संरचना हाम्रो पहिचान, सुरक्षित पानी सफा र स्वच्छ गाउँ हाम्रो अभियान“ भन्ने नाराका साथ सफा र स्वच्छ समुदाय घोषणा र खानेपानी तथा सरसफाई आयोजना सुरु भएको थियो । नेवा संस्थाको सहयोग, च्यारिटी वाटर दातृ निकाय रहेको उक्त आयोजना रोशी गाउँपालिका १० वाल्टिङ्गको साझेदारीमा सम्पन्न भएको हो । नेवा संस्थाको ५० प्रतिशत, रोशी गाउँपालिकाको २५ प्रतिशत लागत र समुदायको २५ प्रतिशत श्रमदानमा सम्पन्न भएको हो ।
गैरी डाँडा गाउँ खानेपानी तथा उपभोक्ता समिती मार्फत निर्मित खानेपानी आयोजना ३४ लाख २४ हजार ७ सय ३४ रूपियाँ लागतमा निर्माण कार्य सम्पन्न भई २५ घरधुरी लाभान्वित भएका छन् । त्यसैगरी डाँडाखर्क माथिल्लो पोखरी खानेपानी तथा उपभोक्ता समिती मार्फत निर्माण सम्पन्न गरिएको उक्त आयोजना २९ लाख लागतमा सम्पन्न भइ ३५ घरधुरी सहित श्री लालीगुँरास बाल विकास केन्द्र लाभान्वित भएको छ। यस आयोजना अन्तर्गत एक घर एक धारा निर्माण गर्दै वडा भित्रका ६० घरमा स्वच्छ खानेपानी पुगेको छ ।
आयोजनाको उद्घाटन गर्नुहुदै अध्यक्ष दिनेस लामाले आफ्नो लागि आफैले गर्यो भने राम्रो र गुणस्तरीय काम हुने भन्ने उदाहरणीय काम भएको बताउनुभयो । पछिल्लो समयमा आफ्नो लागि आफै गरौँ भन्ने गाउँपालिकाको अवधारणा अनुसार यस आयोजना सम्पन्न भएको उँहाले बताउनुभयो । त्यसैगरी रोशी–१० का वडाध्यक्ष विकेन लामाले समुदायको जोश जाँगरले नै आयोजना सम्पन्न भएको बताउनुभयो ।
कार्यक्रममा नेवा संस्थाका बागमती प्रदेश अध्यक्ष भरतप्रसाद भट्ट, पूर्व वडा अध्यक्ष दुधराज तामाङ लगायतको सहभागिता रहेको थियो ।
