काभ्रे,
आज बागमती, कोशी र मधेस प्रदेशमा हल्का वर्षाको सम्भावना रहेको मौसम पूर्वानुमान महाशाखाले जनाएको छ । बागमती प्रदेशमा हिजोको जस्तो भारी वर्षाको सम्भावना नरहेको महाशाखाले जनाएको छ । जोखिमको आँकलन गरी सावधानी अपनाउन मौसम पूर्वानुमान महाशाखाले अनुरोध गरेको छ । त्यसैगरी आज सुदूरपश्चिम, कर्णाली र लुम्बिनी प्रदेशमा दिनभरि नै पानी पर्ने जनाईएको छ । नदीमा जलसतह बढ्ने, डुवान हुने, खहरे खोलाले क्षति पु¥याउने जोखिम रहेको जलवायुविज्ञ धर्मराज उप्रेतीले बताउनुभयो । उहाँका अनुसार पहाडमा पहिरोको जोखिम पनि देखिएको छ ।
भोलि दिउँसोदेखि भने पश्चिम नेपालमा वर्षा घट्दै जाने अनुमान गरिएको छ । पछिल्लो २४ घन्टाको वर्षा विवरण अनुसार कञ्चनपुरको दोधारा मा १ सय २ दशम्लव २ मिलिमिटर, बेलौरीमा १ सय ६१ दशम्लव ६, कैलालीको धनगढी बजारमा १ सय २४.६ अनि विमानस्थल क्षेत्रमा ८५ दशम्लव २ मिलिमिटर पानी परेको मौसम पूर्वानुमान महाशाखाले जनाएको छ । कैलालीको टीकापुरमा १ सय १३ दशम्लव ६, राजापुर बर्दियामा १ सय १३ दशम्लव २, रानी जरुवा बर्दियामा १ सय ४९ मिलिमिटर पानी परेको छ । अहिले बर्दियामा प्रति घन्टा २८ दशम्लव २९ मिलिमिटर वर्षा भएको छ ।
