चितवनमा पहिरोले दुई वटा बस बगाउँदा ६५ जना बेपत्ता, गोताखोरबाट बेपत्ताको खोजी सुरु

काभ्रे,

चितवनमा पहिरोले दुई वटा बस बगाउँदा बेपत्ता ६५ जनाको सशस्त्र प्रहरीको गोताखोर टोलीले खोजी तथा उद्धार कार्य सुरु गरेको छ । आज बिहान ३ बजे भरतपुर २९ सिमलतालमा गएको पहिरोले बगाउँदा दुई वटा गाडी त्रिशूलीमा खसेका हुन् । वीरगन्जबाट काठमाडौँ आइरहेको तथा काठमाडौँबाट गौर गइरहेको बस पहिरोले बगाएको जिल्ला प्रहरी कार्यालय चितवनका प्रवक्ता डिएसपी भेषराज रिजालले जानकारी दिनुभयो ।
उहाँका अनुसार घटनाबारे जानकारी पाउने वित्तिकै इलाका प्रहरी कार्यालय मुग्लिनबाट प्रहरी निरीक्षकको नेतृत्वको टोली घटनास्थलमा पुगे पनि लगातारको वर्षाले उद्धारमा कठिनाइ भएको छ । दुई वटा बसमा ६५ जना जति रहेका प्रहरीको अनुमान छ । तीन जनाले भने गाडीबाट हामफालेर ज्यान जोगाएका थिए । यस्तै चितवनको १७ किलो भन्ने ठाउँमा माथिबाट खसेको ढुङ्गा लागेर अर्को एउटा बसका चालकको मृत्यु भएको छ ।